Parliamentary Secretary Pu K. Lalrinthanga chuan vawiin khan Champhai District Child Protection Centre leh Observation Home tlawhin thawktute nen inkawmna hun a hmang. Parliamentary Secretary hi nimin (15.7.2015) khan Champhai thlengin, Champhai CDPO Office a tlawh nghal a ni.
Champhai Child Welfare Committee Report tarlan danin, April 2014 atanga June 2015 chhung khan chhan leh vang chi hrang hrang vanga naupang laka thubuai thehluh (CNCP Cases), Champhai Child Welfare Committee kuta hlan 189 awmin, heng zinga 114 chu mipa niin 75 chu hmeichhia an ni a. Champhai Child Welfare Committee chuan heng thubuai hrang hrang te hi a bo a bang awm lovin a chingfel nghal vek a ni.
Naupangte hmakhaw thlira kel zelna tur kawng CWC in a ruahman angin naupang 96, mipa 52 leh hmeichhia 44 te chu an chhungte hnenah pekkir a ni a. Naupang 74, mipa 51 leh hmeichhia 23 te chu Children's Home/Shelter Home-ah dahluh an niin, a bak zawng naupang 19, mipa 11 leh hmeichhia 8 te chu DCPU ah te, SSA ah te, Foster Care ah te, District Court a kalpui te bakah Children's Home atanga Shelter Home a dahluh leh te an ni.
Champhai Juvenile Justice Board hnuaiha kum kalta lama naupang thubuai chinfel loh 5, April 2014-June 2015 chhunga naupang chungchang a ngaihtuah dan tarlanah, naupang 55, mipa 3 leh hmeichhia 52 te thubuai a ngaihtuah sak a, naupang 56 te thubuai chinfel sakin, naupang 4 te thubuai ngaihtuah that turin a dah thung.
Champhai Observation Home hi July 8 atang khan luah tanin, naupang 5 leh hnathawktu 10 an awm mek a ni.
Parliamentary Secretary hian Champhai lam chamchilh mekin naktuk hian Local Administration Department Office leh Horticulture Farm a tlawh leh dawn a ni.
