Vawiin khan Mizoram State Co-operative Marketing & Consumers’ Federation Ltd. (MIZOFED) General Assembly vawi 16-na chu Synod Conference Centre, Mission Veng-ah hman a ni a, Co-operation Minister Pu J.H. Rothuama chu Khuallian a ni.

Assembly hawnna inkhawm MIZOFED Chairman Pu K. Lalchamreia kaihhruaiah hian Khuallian Pu J.H.Rothuama chuan MIZOFED chu nasa takin hma a sawn zel a, leiba a neihte pawh a rulh chak thei tawh avangin a lawmawm a ni, a ti a. MIZOFED hi sumdawnna liau liau a nih avangin shareholder neih tam a ngai a, hei hian sumdawnna a ti zauvin a hlawkna pawh a tih tam zawk a rin thu a sawi. Cooperative hi sorkar inrawlh lohna tur ni mahse Mizoramah chuan Cooperative Societies zawng zawngah sorkar chu shareholder lian ber a la ni rih a, hmasawnna hmu tur tak tak chuan tun aia tam share lei a tul a ni, a ti. India sorkarin hmeichhe dinhmun a humhalh leh chawikan nan nasa taka hma a lak laiin Mizoram Cooperative Societies-ah hmeichhe quota paih tak a nih chu pawi a tih thu a sawi a, tun aia tam zawka Cooperative movement-ah hmeichhia leh thalai thiam zawkte kan lakluh a tul a tih thu a sawi bawk. Mizoram leilung hausakna haichhuah ni mek - POL, gas, tuichhunchhuah leh kawlphetha - te chu ram changkang zawkah Cooperative kaltlanga hralhchhuah a nih angin Mizoramah pawh chutiang dinhmun luah thei turin Cooperative ten hmalak a tul a tih thu Minister chuan a sawi.

Registrar of Cooperative Societies Pu Lalpekliana pawhin thu sawiin UNO chuan ram sum leh pai dinhmun siamnaah Cooperative hnathawh ropui zia hriain kumin hi ‘International Year of Cooperatives’ ah a puang a ni, a ti a. Khawvel pumah Cooperative member maktaduai 800 an awm mek a, heng hnuaia hnathawka an chhawr te chu mi maktaduai 100 vel an ni tih a sawi. Khawvelah Cooperative zawng zawng sum dehchhuah chu belhkhawmin kum tin cheng vaibelchhe maktaduai 100 chuang a tling a ni tih tarlangin Pu Peka chuan ram changkang zawkah phei chuan mipui nitin mamawh bakah Banking leh Electricity-a sumdawnna lian ber kengkawhtute chu Cooperative Society te an ni fo, a ti. Hlawkna ngawr ngawr uma sumdawnna kalpui te ai chuan Cooperative te hi an nghetin an tlo zawk tih mithiamten an hmuchhuak a, hei hi a chhan ber chu Cooperative hnuaiah chuan member leh hnathawkte hamthatna tur ngaihtuah tel a nih thin vang a ni, a ti. USA-ah chuan kawlphetha dehchhuah zawng zawng zaa 50% chu Cooperative kaltlanga hralhchhuah a ni a, sorkar pawhin sum indaihlohna an neih changin Cooperative sum an puk sak thin thu a tarlang bawk. India Sorkar pawhin Cooperative movement thatna hriain rampumah Cooperative movement chak zawka kalpui a nih theih nan ram Danpui-ah 97th Amendment a siam nghe nghe a ni, a ti.

Mizoram State Co-operative Marketing & Consumers’ Federation Ltd. (MIZOFED) hi kum 1981-ah din tan a ni a, tunah hian Primary Cooperative Society Member a neih zat chu 288 a ni. Department officer te chhiar tel lovin regular staff 108 an awm a, Muster Roll 30 leh Contract Staff 4, a vaiin 142 an awm. Kum 2011-2012 chhunga MIZOFED-in sorkar atanaga tanpuina a dawn zat chu cheng nuai 71 a ni a, hei bakah hian National Coopertaive Development Corporation (NCDC) atangin cheng nuai 261.73 a dawng bawk a ni. MIZOFED sumdawnna hi hlawm 4 angin a then theih a, chungte chu - POL, LPG, Essential & Consumer bungrua leh Motor lama sumdawnna te a ni a, heng khaikhawmin kum 2011-2012 chhunga Net Profit chu Cheng vaibelchhe 1.34 a ni a. MIZOFED hi POL leh LPG-ah phei chuan Mizoram-ah Distributor lian ber a ni.