Vawiin chawhma dar 11 : 00 AM khan MADC,E&F Conference Hall, Saiha-ah Mizoram puma District hrang hrang te Kangmei venna lama titha inelna a, Saiha District in Pahnihna lawmman a lak chu lawm ani.

He lawmna inkhawm hi Pu Thaly T.Azyu, DCF, MADC chuan a kaihruai a, hunserh Pu Hmaoko Hlychho, Editor, Maraland chuan a hman hnuah District Bawrhsap Pu Alok Swarup IAS chuan thu sawiin Saiha District in kum 2012 a Mizoram chhung District hrang hrang te kangmei venna kawnga inelna neih ah lawmman pahnihna a dawng thei chu lawmawm a tih thu a sawi a, kan Lo neih dan hlui khan ram nasa takin a tichhia in ram a ti bua a, kan tlangram Lo neih bansan anih theih nan sawrkar pawhin theihtawp a chhuah a, Loneitu ten an Lo neih bansan anih theih nan sawrkar chuan NLUP hmangin miretheite khaichhuah a tum mek a, he sawrkar policy hi tih hlawhtlin anih chuan kum tin a kan ram kang leh a kum tela kan ram bua thin hi a veng dawn ani ati a, District thuneitu te lam atang pawhin kangmei venna lamah hian theihtawp chhuah a tan lak zel anih tur thu a sawi bawk.

Pu Solai Azyu, ACF, MADC hnen atanga report tawi ngaihthlak anih hnu ah Pu KH Beihlo, EM i/c Forest etc MADC chuan thu sawiin Kangmei laka inven pawimawhna hi kan hre zolo hle a, Pathian in a thilsiam te veng tha leh vawnghim turin min siam a, ringtu kan nih chuan Pathian thilsiam zawng zawng te venghim a siamtha tur kan ni tiin, ram tikang lo tur leh ramngaw te humhalh hi mitinte mawhphurhna ani tiin Ramngaw te humhalh a tikang mai mai lo turin kalkhawmte a chah a ni.

District Level kangmei venna lama lawmman pahnihna Saiha District in a dawn chu Pu K.H. Beihlo, EM i/c Forest, MADC chuan District Bawrhsap Pu Alok Swarup IAS hnenah a hlan a, District Bawrhsap hian Saiha District chhung a kangmei venna lama titha zual khaw pathum Chheihlu, Chhuarlung leh Chapui khuate hnenah lawmman a hlan bawk. He programme ah hian Department hrang hrang hotute, MADC lam hruaitute leh Chanchinthar thehdarh tute an tel kim hle a ni.