No.3333/2021-2022

Aizawl, the 9th December 2021 : Vawiin khan Cooperation Minister Pu C. Lalrinsanga, Agriculture leh Irrigation & Water Resources enkawltu ni bawk chuan Mizoram State Cooperative Marketing and Consumers Federation Limited (MIZOFED) kum 40 tlin Ruby Jubilee lawmna program, Taxation Department Auditorium MINECO a MIZOFED in an buatsaih chu khuallian niin a hmanpui a. MIZOFED Chairman lo ni tawh, tuna Turial bialtu ni mek Pu K. Laldawngliana MLA pawhin khualzahawm niin he hun hi a hmanpui bawk a ni.

Pu C. Lalrinsanga chuan MIZOFED dinhmun tha chho mek chu lawmawm a tih thu te, Federation hlawhtling leh entawntlak an nih thu te sawiin mihring hi kan upat chhohin kan chak lo tulh tulh a, pawl leh corporation te erawh an upat chhoha an chak loh chuan inenletna tur an neia, a tha lo lai siamthat ngai a awm tihna a ni, a ti a. MIZOFED chu Mizoram pawl lian tak mipui rawngbawlna an thawh mai bakah sumdawnna pawl lian tak a ni tiin thanna nasa tak an nei thei a, nasa leh zuala District khawpui leh khawpui dangah te mipui mamawh hrang hrang phuhru a, inzarpharh zela hlawhtinna nei zel turin a duhsak thu a sawi.

Cooperation Minister chuan hripui lenlaiin Vegetable Supply Chain ah MIZOFED in an thawhhlawk leh mipuiin an hlut thu te sawiin changtlung zawka Vegetable, Fruits leh Livestock Supply Chain phuisui zawka kalpui dan ngaihtuah a ngai a, hemi kawngah hian RKVY hnuaia sak tur thei leh thlai dah thatna cold storage leh thil dangte chu tangkai takin kan hmang thei dawn in ka hria, a ti. MIZOFED chuan thanna tur scope tam tak an neih dante sawiin thawktu zawng zawng ten pawl hi mahni ta neiha thinlung takin a hawlhtlin leh a hlawk zelna atana in pumpek turin Ruby Jubilee lawmnaa tel MIZOFED hnuaia thawkte chu a chah a. Hmasawnna thar thlir chungin kalphung tha lo hnawl ngama mipui mamawh hlenchhuak zel chunga Cooperative Movement dik tak kalpuitu ni turin thawktu zawng zawng te chu a fuih bawk a ni.

Khualzahawm hun hmanpuitu, MIZOFED Chairman chhuak ta, Pu K. Laldawngliana MLA chuan neitu rilru puin Pathian rawngbawlnaah ngaiin MIZOFED tana theitawp a chhuah dante sawiin Pathianin chumi avang chuan amah leh MIZOFED chu mal a sawm nia a ngaih thu a sawi a. MIZOFED chu pawl intodelh a ni tiin COVID hripui len tan tirh leh ramri buaiah te mipuiin an tangkaipui hle nia a hriat thu te a sawi a ni.

Ruby Jubilee lawmna programme hi MIZOFED Vice Chairman Pu K. Rothangpuia’n kaihruaiin MIZOFED Managing Director Pu Rinzuala’n MIZOFED than dan leh sumdawnna hrang hrang an khawih dan Report a sawi a ni.

MIZOFED hi December ni 9, 1981 khan Society pathum – Mizoram Wholesale Cooperative Stores Ltd., Mizoram Apex Marketing Society Ltd., leh Mizoram Cooperative Super Market Ltd. te inchhun khawma din a ni a. Leiba cheng nuai 209.80 neisa in bul an tan a. Tunah chuan an sum veivir pawh kum khata vaibelchhe 200 ai pawhin a tam tawh a, kum 2019-2010 ah hlep Net Profit cheng vaibelchhe 9.30 leh kum 2020-21 ah hlep cheng vaibelchhe 2.62 vel an thawkchhuak a ni.

Shareholders 323 awm mekin Board of Directors kum 5 zela inthlanna an nei a. Thawktu nghet mi 83, muster roll a thawk mi 54 leh contract a thawk mi 33 an awm mek a. Mizoram khaw hrang hranga petrol pump 8, LPG Distributor 6 leh SKO Designated Point 15 an nei mek a. Sumdawnna lian tak tak an kalpui te chu POL, LPG, mipui mamawh leina dawr Essential Commodities & Retail stores te leh oil leh gas phurhna carrying contractor te an ni. Mizoram mamawh POL za a 40 chu MIZOFED lakluh niin Mizoram pumah LPG Consumer 81520 an nei mek a ni.