National Curriculum Framework (NCF) -2005 in a duan chhuah dungzuiin Mizoram-ah a thawh khatna atan Activity Based Learning (ABL) chu sawrkar primary school thlanchhuah 20-ah bul tan a ni dawn ta a; he zirna kalphung thar hi vawiin chawhma dar 11:00 khan Education Minister Pu Lalsawta chuan SCERT Hall, Chaltlang-ah a hawng a ni.

Education Minister Pu Lalsawta chuan, “Naupang lehzualte lehkha kan zirtir dan kalhmang hi ennawn a ngai hle a; naupang-in homework an ngah lutuk te, zirlaibu rit tak tak an ak thin te, thiamna tak tak rilrua tuh si lova exam ringawt tinzawna kan inkaihruai thinte hi tihdanglam a hun a. Naupangin school an thlakhlel theihna tur leh an zirlai chu a taka hmang thei tura thiltih nena tangkawpa inzirtirna tur ABL hi hlawhtlinpui ngei turin a bul tan hmasa turten tan kan lak a ngai a ni” a ti. Mizoram-a zirna kalphung chu zirlaite tana chhenfakawm lehzual turin her rem mek zel a nih thu sawiin Pu Lalsawta chuan, “Education lamah thil thar tam tak kan ti a; ABL bulk an tan dawn a, eizawnna tinzawn zawngin Vocational Education te kan uar zual sauh a, Continuous & Comprehensive Education (CCE) te kan kalpui mek a, College lamah pawh semester system-in kan kal tawh bawk a ni. Tunah hian NCF duh dan angin syllabus hrang hrang pawh ngawrh takin kan ennawn mek bawk a ni” a ti. Thiam taka subject hrang hrang zir tura tawng thiam a pawimawhzia sawiin Education Minister chuan, ‘Mahni tawng kan thiam bakah English thiam hle hi a pawimawh a, chutiang kan nih chuan eng subject pawh zir ila nasa takin kan sawtpui dawn a ni” a ti. Pu Lalsawta chuan naupang school la kai pha lo deuhte tana sawrkarin anganwadi a buatsaihte chu sit lova fate kaltir theuh chu Mizoram nu leh paten kan tih tur a nih thu sawiin, “Anganwadi atang hian naupang te te ten mi dang nena khawsak ho te an lo zir lawk a, school an kai theih hmain thil tam tak an lo thiam lawk thei a ni” a ti bawk.

Activity Based Learning (ABL) hi zirna kalphung thar a ni a, naupangte chuan an zirlaibu chu hmanraw chi hrang hrang nena tangkawpin an zir thin dawn a; India ram state tam takin an la tihhlawhtlin theih loh laiin Mizoram chu a taka kalpui thei state tlemte zingah a tel ve dawn a ni tih Pi Malsawmthangi, SCERT Director chuan a sawi. ABL bul tanna tur atan hian SDEO East, West leh South atangin primary school 20 thlanchhuah a ni a; heng school hnenah hian ABL hmanrua tur – Mathematics, Mizo leh English subject atan bik sem an ni a. Kumin hian ABL hi Class I atanga tan phawt a ni ang a, pawl sang zawkte chu a tahtawla hma chhoh tum a ni. ABL kalpuina tura Primary School thlan bika zirtirtute hi 21-22.8.2012 leh 23-24.8.2012 chhung khan SCERT-ah training pek an ni.

Vawiina ABL Flagoff programme hi MBSE Chairman Rev. Dr. Lalchungnunga bakah RMSA, SSA leh DIET hnuaia officer-ten an hmanpui a ni.