920/2025-2026

25th June, 2025 : Vawiin khan Mizoram chhunga Assembly Constituency 40 (sawmli) atanga mi pakhat theuh thlan chhuah Booth Level Officer 34 (sawmthum pali) leh Supervisor 6 (paruk) an vaiin mi 40 (sawmli) bakah Electoral Registration Officer 5 (panga) te chu Election Commission of India (ECI)-in a buatsaih India International Institute of Democracy and Election Management (IIIDEM), New Delhi-a training turin Mizoram an chhuahsan.

Mizoram atanga training tura kalte hi ECI-in training programme a buatsaih meka thawh sawmpalina (14^th Batch) a tel turte ni in, ni 26-27 June, 2025 chhung khian IIIDEM-ah an training anga, training zawh hnuah ni 28 June, 2025 (Inrinni)-a Mizorama rawn let leh tura ruahmanna siam a ni.

Training-a tel turte hian BLO mawhphurhna leh Electoral Roll buatsaihnaa BLO-te tih tur hrang hrang an zir dawn bakah Electronic Voting Machine (EVM) chungchangah zirtirna pek an ni bawk ang. Mizoram bakah hian State hrang hrang Telengana, Dadra Nagar Haveli, Daman & Diu, Tripura leh Gujarat atanga kalte nen a rualin training hi an nei ho ang.

Election Commission of India chuan India ram chhunga BLO zawng zawngte training pek vek tumin ruahmanna a siam mek a. Mizorama BLO-te tana training buatsaih a nih hunah tuna BLO/Supervisor training-a kalte hi training pe chhawng thei tura beisei an ni.