921/2025-2026

25th June, 2025 : Vawiin khan School Education Directorate Conference Hall-ah Adult Education Wing-ten thlakip chhuak magazine Meichher an tih chhuah thin Golden Jubilee lawm nan Zoram Entu Meichher Seminar neih a ni.

Zoram Entu Meichher Seminar hawnnaah hian School Education Director Pi Angela Zothanpuii chuan thusawiin Meichher Chanchinbu thiltumte chu nghet takin an vuan reng tih a sawi a, Meichher Golden Jubilee lawm kum takah Mizoram chu ziak leh chhiar thiam full literacy a puan a ni ta chu Meichher thiltum hlawhtlinna ropui tak a ni a ti a, a tirte atanga buaipuitu Pu R.Lalrawna chu literature & Education huangah Padma Shree Award hlan a lo ni leh chiah te hi Meichher Chanchinbu hlutna tarlangtu a ni a ti bawk.

Meichher Editor Pu T.C.Lalremsiama chuan report le in, Adult Education Wing-in an tihchhuah thlakip chhuak chanchinbu 'Meichher' chu a tirah chuan 'Zoram Eng' tiin tihchhuah niin, kum 1975 March & April thla chhuak kha a bul tanna a ni a, amaherawhch, a túulna leh remchan zâwkna avangin kum 1975 October thla chhuak atangin 'Meichher' tia a hming thlâk a nih thu a sawi a. Kum 1975 March & April thla chhuak atanga chhiarin June 2025 chu bu 808-na a ni.

Meichher hi sawrkar sum sêngin a tîr ațangin thla tin bu 3000 zêla tihchhuah a ni a, a thlawna sem a ni. Hripui COVID-19 lêng harsatna avâng khân "Meichher' pawh thla eng emaw zât chhủng chu bu 2800-a tihchhuah a ni a; mahse, kum 2022 November thla ațanga tûn thlengin bu 3000-a tihchhuah zui a ni leh ta a ni Meichher Publisher atân hian tihchhuah tan tirh atangin Department hotu ber Director chu tûn thleng hian hman a ni thin a ni.

Seminar-ah hian thupui hrang hrang pali zirho a ni a, Pu F. Vanlalrochana, MPS, Book of the Year 2024 Awadee ziah Meichher tihlutute tih paper te, Dr. C. Lalawmpuia Vânchîau, Asst. Professor, Helen Lowry College ziah Mizo Literature atâna Meichher Magazine hlutna leh ṭangkaina tih paper te, Pu R. Lallianzuala, Chairman Mizo Language Development Board (MLDB) ziah Mizoram zirna (education) atâna Meichher Magazine ṭangkaina tih paper te, Dr.H.Laldinmawia, Head, Department of Mizo, PUC ziah Meichher Magazine zir chianna tih paper te zirho a ni.

Meichher Golden Jubilee lawmna pui ber chu Ni 26.6.2025 Ningani-ah Vanapa Hall-ah neih a ni dawn a ni.

Vawiina Meichher Seminar-ah hian Department officer te, Mizo Academy of Letters hruaitute, Mizo Writers Association hruaitute, MUP leh MHIP hruaitute, Mizo Literature & Language Teachers Academy hruaitute, Mizo Poetry Society hruaitute, Higher Secondary lecturer leh  Zirlaite an tel a ni.