Vawiin zing dar 10.00 atang khan nileng awh turin Synod Conference Centre, Aizawl-ah Mizoram chhunga Forest ram humhalh leh a kaihhnawih (Forest Reservation and Its Related Issues in Mizoram) chungchang zirhona hun hman a ni a; he zirhona hi Zoram Research Foundation leh Synod Social Front tangkawpten an buatsaih a ni a; Revenue Minister Pu J.H. Rothuama chuan a hmanpui a ni.

Pu J.H. Rothuama chuan District Council hunlai ata tawh Mizoram-a ram inpekthuah lo inchherchhuan nasa lutuk tawh chu Dan mumal tlawhchhan fak tur a awm loh avanga chinfel a harsat thu sawiin, “Sawrkar hmasain land reforms a lo kalpui tawh chu chhunzawmin, IAS (Retd) rualte Expert Committee member-ah ruatin tunah hian a hmawr kan bawk tep tawh a. Dan mumal, felfai leh a theih anga famkim duan chhuah ngei kan duh avangin Legislative Assembly session lo awm leh tura kan pharh hmain a duh apiangten Principal Secretary (Revenue) emaw, Revenue Director hnenah rawtna thlen theih a ni a. He Dan duan mek hi zau zawka kan zir chian theihna turin a bu-a siam a nih bakah, internet-ah pawh a en theih dawn a ni” a ti. Revenue Minister Pu J.H. Rothuama chuan ram leilung enkawl hna chu Forest Department; Revenue Department leh LAD ten thuang thuma an inchan sem thu sawiin, “Hetiang renga kalpui hi Mizoram Assembly pawhin tha a tih loh avangin Forest Minister leh LAD Minister te nen mumal taka khaikhawm dan sawiho a ni tawh a; thangtharte tana kan ram leilung enkawl dan tur Dan tha tak hnutchhiah hi kan tihmakmawh a ni” a ti bawk. Seminar chhimtute chu Mizoram hmakhua atana rawtna fumfe tak sawrkara thlen tur ngaihtuah chhuak tura an thiamna seng theuh turin Pu J.H. Rothuama chuan a sawm a ni.

He zirhona thupui sawi-hawngtu Pu Lalkhama IAS (Retd.), Vice-Chairman, Mizoram State Planning Board chuan “ State Forest Reserve atana ram kan puan dawnin sawrkar ram ngei chauh a ni tur a ni a; mimal ram a huam thiang lo. Mimal in leh lo, huan leh ram emaw State Reserve Forest-a puan ngawt theih a ni lova; chutiang mimal ramte chu sawrkarin zangnadawmna pe-in, a neihsak hmasa phawt thin tur a ni” a ti. Parliament-in dan a siam, The Forest (Conservation) Act 1980 chu Mizoram-ah pawh hman theih a ni a; Dan tha tak a nih rualin Mizoram dinhmunah chuan Dan khirhkhan tak a nih tur thu Pu Lalkhama chuan a sawi lang a. “Forest Reservation chungchang kan sawi leh a kaihhnawih a Order chhuakte hian Mizoram mipui tan nghawng thui tak a nei tawh a, a nei zel dawn a ni” tiin, seminar chhimtute chu ngun taka an ngaihtuahna seng turin a Pu Lalkhama chuan sawm a ni.

Vawiina seminar buatsaih-ah hian mi parukin paper an present-te chu kalkhawmten chipchiar takin an sawiho a; an thil zirchhuahte bawhzui turin Study Group an indin a ni. Seminar hawnna inkhawm hi Prof. Thangchungnunga, Chairman, Zoram Research Foundation chuan a kaihruai a; Rev. Lalzuithanga, Executive Secretary i/c Social Front , Mizoram Synod chuan hunserh a hmang a ni.