Champhai District KVIB buatsaih, chawlhkar 2 awh tur PMEGP beneficiaries te tana EDP Training chu vawiin dar 10.30 am khan Govt. Champhai College Seminar Hall-ah Champhai DC Pu Vijay Kumar Bidhuri IAS-in a hawng.
Hawnna thu sawiin DC chuan sumdawnna lamah ani emaw, kan hnathawhna kawng engkimah hlawhtling tur chuan ‘Teirei peih mi’ nih a ngai a ni, ti a training tura kalkhawmte chu fuihin kan ram dinchhuahna atana thil pawimawh ber chu Industry hi a ni a, keini ang thingtlanga awmte tan erawh Industry lian a din theih lohva, mahse KVI kaltlangin Industry tenau kan siam thei a, chuta tang chuan eizawnna tha deuh kan nei thei dawn a ni, a ti. DC chuan Sorkar hmalakna hi, a tum ang ngeia ti hlawhtling tura taima taka in thawh chuan a lawmman chu nangmahni tan a ni a, mahse a scheme anga in tih peih loh erawh chuan in tuar dawn a ni, a ti a, Training-a kalkhawmte chu Margin Money duh vang chauh ni lovin, an eizawnna tur theuhva an hlawhtlin theihna tura thahnem ngai taka training turin a chah bawk.
Govt. Champhai College Principal Pu Lalnunmawia pawhin thutawi sawiin Mizo te rilru ah tlemte thawha tam tak hlep tumna rilru a lian em em a, hausak thut duhna rilru put avanga tlachhe ta sawi tur tam tak an awm bawk a, he rilru hi kan paih a hun tawh a ni tiin EDP training-a kalkhawmte chu duhamna rilru dahtha a eizawnna ngialnghet an neih theinna tura an rilru buatsaih turina chah a ni.
EDP Training hawnna inkhawm kaihruaitu District Village Industries Officer (DVIO) Pu Vanlalruata chuan kan DC hmalaknain Champhaiah ngei EDP Training neih theih a ni ta hi a lawmawm a, nikumah mi 31 in hlawhtling takin an training chhuak tawh a, tunah hian mi 35 in Training an nei leh dawn a ni, tiin training chhuakte hnenah Certificate kan pe ang a, he Certificate hmang chauh hian Margin Money a lakchhuah theih a ni, a ti.
EDP Training neih anih chhung hian Champhai khawpui chhunga mithiam hrang hrang ten a inchhawkin Training hi an pe thin dawn a ni.
Pu Siamhlira Sub-Divisional Industry Officer pawhin fuihna thu tha tak a sawi a, Pu K. Lalramlawma JE, MKVIB in lawmthu sawiin EDP training hawnna programme chu khar a ni ta a ni.
