Nimin khan Health Minister Pu Lal Thanzara chu Hri danna(Measles-Rubella) chungchanga Mizoram Sawrkar pui tura Ministry of Health & Family Welfare in doctor 4 an rawn tirh te chuan a pisaah an hmu a. Mizorama Measles-Rubella Campaign January 2018-a neih tura atana Health Department-a hri danna kaihhnawih a thawkte zirtirna an pek dan tur leh he ruahmanna an kalpui dan tur chungchang an hrilh a ni.

Health Minister Pu Lal Thanzara chuan doctor rual pali leh anmahni tawiawmtu WHO-a thawk mek Dr. Lalhlimpuii te chu he Campaign hi hlawhtling taka, a mamawh zawng zawngte huap a nih vek theih nan Health Department chu theihtawp chhuahpui turin a sawm a. Sawkar Laipui programme in Measles-Rubella hri danna a thlawna ruahman a ni ta chu lawmawm tiin hmun kilkhawr leh District hnufum bik te chu ngai pawimawh turin a chah a ni.

Doctor pali te hi - Dr Amitabha Sarkar, WHO India(Lawngtlai District); Dr Burri Thirumala Rao (Lunglei leh Saiha District –te); Dr Rajesh Madhukar Dighe (Serchhip leh Champhai District-te) leh Dr Shrikant Supekar (Kolasib & Mamit District-te) an ni a. Anni hian District hrang hrang te thla 3 tal an awm chilh ang a, hridanna (Immunization)ah leh tlang hrileng punlun tur enthlithlaina (Surveillance)ah te kawng engkimah an awmna District apiangah an enpui dawn a ni. Hridanna beihpui (Intensified Mission Indradhanush) Lunglei, Lawngtlai leh Mamit-a neih tur pawh an enpui nghal bawk ang.