Vawiin chhun dar 12:00 khan Pu P.C. Lalthanliana, LAD Minister hovin sawrkar phalna la lova din(Unathorised Settlement) thingtlang khaw 94 dinhmun ngaihtuahin LAD Conference Hall, Thakthingtlang-ah sawrkar mi pawimawh te an thukhawm. Committee chuan khaw 94 zinga khaw 2 chu village council pek turin a ti a, khaw 21 te pawh sub-village committee pek hlawm ni se ti in a rel Autonomous District Council huam chhunga khaw awm te chu LAD thunuaia an awm ve loh avangin ngaihtuah tel an ni lo thung.
Vawiin committee ah hian ni 31.5.2010 a Sub-committee on Unauthorised Settlement/Dwellers thukhawm in District Level screening committee te thutlukna zulzuia ruahmanna a lo siam tawh chu pharh a ni a, ruahmanna lo siam tawh zinga tam zawk chu pawm an ni. Sawrkar phalna la lovin Aizawl district ah khaw 6, Lunglei district ah khaw sawmli pasarih ( 47), Champhai district ah khaw panga( 5), Serchhip district ah khaw pahnih(2), Mamit district ah khaw sawmpariat(18) leh Kolasib district ah khaw sawmparuk(16) an awm a ni.Heng khaw sawmkuapali(94) hi chipchiar taka bihchian an nih hnuin - khaw sawmhnihpali(24) - Aizawl district ah khaw pakhat( 1), Lunglei district ah khaw sawmparuk(16), Champhai district ah khaw (1) Serchhip district ah khaw pakhat(1) leh Kolasib district a khaw pahnih(2) te chu Sub-Village Committee atan hlan kai ni se ti in ruahmanna siam a ni a; Lunglei district a khaw pakhat(1) leh Mamit district a khaw pakhat(1) chu Village Council pek ni se tiin thutlukna siam a ni bawk. Vawiin Committee ah hian Pu Rohmingliana, MCS, Secretary, LAD, Pu Biaktluanga, MCS, Director, LAD, Pu Rosiama Vanchhawng, IFS, Chief Conservator of Forest, Pu R.Lalhmangaiha, MCS, Director, LR&S te bakah District 6 aiawh te meeting ah hian an tel.
