Vawiin khan Industries Department hnuaia Geology & Mining Wing ni thin chu Directorate of Geology & Mineral Resources tih hmingpu in Directorate puitlingah hlankai a ni ta a. Directorate thar hawnna inkhawm, Luangmual-a neihah Industries Minister Pu S. Hiato chu khuallian niin Parliamentary Secretary Pu H. Zothangliana chu khualzahawm a ni.

Pu Hiato chuan he Directorate tharah hian Mizoram sorkar leh ram mipuiten beiseina sang tak an nei a ni, a ti a. Mizoram leilunga Pathianin rohlu tak a dah, haichhuak tura hna chak taka kalpui mek a nih thu te, nakin lawka Mizoram chawm thei tur khawp  sum tam tak hmuh theih a beiseiawm thu te a sawi a.Mizoram area hmun 100 a then a hmun 59 vel lai a mithiamten survey an neih tawh atangin Gas awm ngei a ngaih a nih thu leh Oil pawh awm ngei tura beisei  a nih thu sawiin Mizoram pumpui tana malsawmna, miretheite chhawmdawltu leh thalai tam tak tana eizawnna siam saktu a la ni ang, Minister chuan a ti a. He Direcotarate thar a thawktu zawng zawngte chu thahnemngai taka an tha leh zung, an ngaihtuahnate seng turin a fuih a ni. Minister hian Directorate of Geology & Mineral Resources a Director thar tur atan Industries Commissioner/Secretary  nilai Pu R.L Rinawma chu dah lailawk a nih thu a puang nghal bawk.

Khualzahawm Pu H. Zothangliana pawhin Directorate thar a Geology & Mining Wing hlankai a ni ta chu lawmawm a tih thu sawiin beiseina sang tak a neih thu a sawi a. Sorkarin thawktute chunga rinna a nghah vang leh investment neihna tlaka a ngaih avangin thil awlai lo tak ni mah se he Directorate thar hi siam a nih thu a sawi..

Geology & Mining Wing hi Industries Department hnuaiah 1980, April ni 7 khan din niin tunah hian thawktu an vaiin mi 106 an awm mek a. Section hrang hrang-Mineral Investigation (Oil & Natural Gas), Geo-technical Investigation, Ground Water Investigation & Development, Geographical Investigation leh Minor Mineral Investigation tih te hi Directorate of Geology & Mineral Resources hnuaia awm te chu an ni.

He inkhawm hi Industries Commissioner/Secretary Pu R.L Rinawma chuan kaihruaiin Jt. Director, Dr.H.Lallenmawia'n  Geology & Mineral Resources lo indin chhoh dan leh an hnathawh dan tlangpui a sawi a. He hunah hian Parliamentary Secretary Pu Lalrinmawia Ralte, Col. Z.S. Zuala MLA, Pu K. Lalrinthanga MLA, Pu John Siamkunga MLA, Pu Lalthansanga MLA, Industries Director Shurbir Singh leh mi pawimawh dangte an tel a ni.