2483/2025-2026

Aizawl the 1st December 2025: Vawiin khan Chief Minister Pu Lalduhoma hovin Mizoram Agricultural Marketing Board te chu CM Conference Hall-ah an thukhawm a, Mizoram Ginger Capital of India-a an puan avangin NITI Aayog chungah lawmthu an sawi.

Meeting-ah hian tun hnaia hmalakna report hrang hrangte ngaihthlak a ni a.

Kumin November ni 24 a New Delhi-a neih zawh tak Mizoram sorkar leh NITI Aayog buatsaih Stakeholders Consultation for Mizoram Ginger Produce chungchang report a ni a. Kha meeting kha Mizoram state puala New Delhi-a official meeting lian ber a la nia hriat a ni. Sorkar laipuia Ministry hrang hrang aiawh leh sawhthing leitu leh process-tu investor 60 chuangten Mizoram sawhthing lei leh hralh chungchang inrawnkhawmna an nei a ni.

Kha Consultation Meeting-ah khan NITI Aayog chuan Mizoram chu "Ginger Capital of India" ah a puang a. Hei hian Mizoram chu sawhthing quality tha neitu state a nihzia a tichiang hle a ni. Tin, tun hnaiah Mizoram chu India rama sawhthing thar tam state zingah a inhlang chho mek bawk.

Hei vang hian vawiina MAMB meeting chuan NITI Aayog chungah lawmthu a sawi a, sawhthing quality tha, chemical laka him ngei tharchhuak tura nasa zawka tan lak zel an rel. Chuvang chuan, kum thar lama Organic hmanga sawhthing ching thei tur khuate chu MAMB hnena in-report turin an ngen a, organic-a kalpui thei khuate chu Collection Center kaltlang kher lova, an khuaa leisak dan dap a ni ang. Kumina ching mek zingah pawh organic taka kalpui mek khuate chuan MAMB hi hriattir nghal tur a ni e.

Kumina sawhthing lei chin report pek a ni a. Sawhthing hi kg 3,38,35,182 lei a ni a, support price pek chhuah zawng zawng chu Rs. 1,37,72,04,477.50 a ni.

MAMB hian December ni 5 - 6 hian Aijal Club-ah sawhthing Buyer - Seller Meet nei turin hma a la mek a, India ram hmun hrang hrang atangin hetiang lama tui mite an lo kal khawm dawn a ni. He mi atana an inbuatsaihnate an thlir ho va, hmalak mekna chu tha an ti. Sawhthing thar lei thei tur hi Buyer - Seller meet lo awm turah hian inremna ziahpui theih beisei a ni.

Sairang Horticulture Centre-a Weighbridge siam mek leh tui dahkhawlna siam thar chungchang ngaihthlak a ni a, he Horticulture Centre, Sairanga sawhthing Processing Unit thar chu nakkum January ni 12-a hawn tum ni se, an ti.

SSC 65 ten rualkhai taka a man (a rate) an kalpui theih dan tur ruahmanna siam a ni tawh dawn bakah SSC leh DAMC te hnenah an chet velna sum mamawh zualpui pek an ni ang. Buffer stock a awm tawh lo vang a, Sawhthing Society member-te ta chauh lei a ni ang. Sawhthing Society, Cooperative Society a inziaklut tlakte chu lo inziaklut vek turin beisei an ni.

State pawn atanga sawhthing Slice Dry lei duh an tam thin avangin Mizo Innovator pahnihte thilsiam Sawhthing channa leh ur rona khawl Rapchung Technology leh Tapchhak Technology khawlte chu Handholding Scheme atanga lei an rel a, a enkawltu turte chu an hnathawh that dan a zira ngaihtuah a ni ang.

Hmunphiah ro hi sorkar rate-in ZOHANDCO in a lei leh dawn a, midang hnena sorkar rate aia to va hralhna hre tan hralh theih reng a ni a, sorkar rate aia tlawma hralhte hnenah support price pek an ni lo vang. A chhan chu ZOHANDCO in sorkar rate-a a lei vek theih dawn vang a ni. Mimal leh sumdawng hmunphiah leitute chuan Land Resources, Soil & Water Conservation Department hnenah certificate of origin lak tur a ni a, chumi hmang chuan EF& CC ah transit pass lak leh ngei tur a ni.

Kumin sawhthing lei tan ni atan February ni 2, 2026 chu an ruat a. Hmunphiah hi February leh March 2026 chhunga lei a ni ang a, Aieng leh Mizo Hmarcha hi February atanga April thla chhung lei a ni ang a, Buhhum hi tun Novemberah hian lei tan tawhin kum thar January thla thleng lei a ni ang.

Meeting-ah hian Pu PC Vanlalruata, Minister, Agriculture & Farmers Welfare leh Dr. KC Lalmalsawmzauva, Adviser to CM te, MAMB members te an tel a ni.