Mizoram sorkarin a sawm angin Japan International Cooperation Agency (JICA) chuan Mizorama Agriculture kalphung rawn zira, changtlung leh huamzau zawka kalpui dan tur rawn ruahman turin vawiin khan JICA aiawhin Study Team member 2 - Pu Mitsunori Saito leh Pu Yushi Nagano - te Aizawl an lo thleng a. Vawiin chawhnu vek khan Mizoram sorkar hnuaia Agriculture, Horticulture, Soil Conservation, Fisheries, Sericulture, AH&Vety leh Minor Irrigation Department hotute nen meeting pawimawh tak an nei nghal a ni.

JICA hian Mizorama buh leh thlai chi hrang hrang chin dan, a bik takin tui hman tangkai zawk dan tur te zirin, Agriculture programme tha zawk duanchhuah chu an tum ber a ni dawn a. He Study team-in thupuia a neih chu “Study on Hill-side Agriculture in Northern 3 (Three) Districts of Mizoram State” tih a ni ang. He Study Team senso zawng zawng chu JICA-in a tum vek dawn a ni.

Aizawl-a an cham chhungin JICA officials te chuan he Study kaihnawih department hrang hrang Minister te, Chief Secretary leh principal Secretary te an hmu dawn a. Aizawl chhehvela khaw hrang hrang tlawh kualin Mizorama loneih dan an en nghal dawn a ni. Vawiina JICA aiawh pahnihte report a zirin JICA hian Expert/Consultant an rawn tir leh dawn a ni.