Regional Institute of Paramedical and Nursing Sciences (RIPANS),Mizoram chuan vawiin khan Vanapa Hallah Graduation And Lamp Lighting Ceremony an hmang a, Chief Minister Pu Lal Thanhawla chu khuallian a ni.
 
 
Chief Minister Pu Lal Thanhawla chuan kum 1997 a RIPANS din anih dawn khan a lungphum pawh amah ngeiin a phum thu sawiin, Board of Governors ah Chairman alo nih tawh thu te a sawi a. Pu Hawla chuan Mizoramah hetiang zirna in, RIPANS dah a ni hi lawmawm a tih thu sawiin, India Hmarchhak state 8 ten lungrual tak leh unau pianghmun ang maia an zirho theite hi a vanneihthlak a ni a ti a. North East state mipuite hi ralthuam chelek kan chinna chhan ber pakhat chu sorkar laipuiin hun rei tak min ngaihthah vang nia a hriat thu a sawi a. Amaherawhchu,tunah chuan nasa taka thang chhovin kawng hrang hrangah, a rampum ang te pawhin thil chhuanawm tak tak leh chawimawina chenin kan hawn ve thei ta te hi thil lawmawm tak a ni a ti. Sorkar laipuiin Look East Policy a duan te hi hman tangkai thiam a tulin, a pawimawh a ni tiin, midang ten min rawn tih sak nghak lovin, keimahni ngeiin kan tum tur a ni a ti.

Pu Lal Thanhawla chuan RIPANS chu hmun kilkhawr takah awm mahse hlawhtlinna duhawm tak tak an neih thin avangin Director leh a faculty member chungah lawmthu a sawi a. Zirchhuakte pawh mite tana mi tangkai ni chho zel turin a duhsakna a hlan bawk a ni. Chief Minister hian zirlai ti tha bikte hnenah chawimawina, proficiency award a hlan bawk .

Ripans hi NEC hnuaiah kum 1996 vel khan din tan a ni a. Kum 2007 April ni 1 atang khan Union Ministry of Health & Family Welfare hnuaiah dah a ni leh a. Degree Course hrang hrang, B.Sc (N), B.Sc (MLT) leh B.Pharm te leh Diploma Course, RICIT leh Opthalmic Technology ah te zirna a pe a. A Governing Body hi Board of Governors leh Executive Council te an ni a. Kum 2008 – 2009 chhunga zirlai awm zawng zawng chu 436 an ni. Hmarchhak state hrang hrang ten zirna chi hrang hrangah seat 3 zel an neih lain, Mizoram chuan seat 11 atanga 24 thleng kan nei thei a ni.

Vawiina Graduation Day hman hi batch 9 na an ni a. Lamp Lighting (Mombati chhit) hi Nursing Institute reng rengah tih thin vek a ni a; Mombati chhit hian thil kan hriatte (knowledge) a entir a ni.
 
 

Attachment

  • Loading attachment...