Ni 2 awh tur Mizoram Agriculture Service Association (MASA) General Conference vawi 2-na chu vawiin khan Agriculture Conference Hall-ah tan a ni a. Conference hawnna inkhawm hi Agriculture Director Dr. C. Lalzarliana, President, MASA-in a kaihruai a, Parliamentary Secretary to CM Pu Lal Thanzara chu Khuallian a ni.

Parliamentary Secretary Pu Lal Thanzara chuan Agriculture chu Mizoram ei leh bara intodelhna tura department pawimawh tak a nih avangin chak zawka hmalak a nih theih nana MASA din a ni chu tha a tih thu a sawi a. Agriculture Department-a hnathawktute chu sorkar kut leh ke pawimawh tak an ni a, NLUP hnuaiah chhungkaw 6000 chuang khaichhuah ngaite khaichhuah chu Agriculture Department kutah sorkarin a dah avangin theihtawp chhuah zel turin a chah a ni.

Vawiin Conference hawnnaah hian Pu R.K. Nithanga, Secretary i/c Welfare kaihhruaiin MASA member 5 thite sunna hun hman a ni a. Pu J. Rothanga, Secretary general hnen atangin Report ngaihthlak a ni a. Pu Tlangtinmawia Zote, Secretary i/c Information & Publicity kaihhruaiin an member Promotion hmute leh Ph.D. Degree hmu tharte lawmpuina hun hman a ni bawk.

MASA General Conference hi naktuk-ah Tourist Lodge, Chaltlang-ah chhunzawm leh a ni ang a, he hunah hian Rorel leh Association hruaitu thar an thlang ang.