Vawiin 23.1.2013 khan Mizoram Agriculture Service Association (MASA) chuan Agriculture Conference Hall-ah General Conference an hmang. He General Conference, Pu R.K. Nithanga, President, MASA kaihhruaiah hian Pu H. Liansailova, Agriculture Minister chu khuallian niin, Pu K.S. Thanga, Parliamentary Secretary, Agriculture chu khualzahawm a ni a. Pu Lalram Thanga, Principal Secretary, Agriculture pawhin General Conference hi a hmanpui bawk.

Khuallian Pu H. Liansailova chuan Agriculture Officer-te chuan thawhhona tha tak an neih avangin kawng hrang hrangah hlawhtinna hmuh tur a lo awm ta a, Sorkar-in Mizoram Agriculture hmasawnna tura ruahmanna a siamte tihhlawhtlin chhoh zel a nih avangin India Sorkar Laipui, Ministry of Agriculture-te hriatpui tham Buh thar tam kawngah pawh theihtawp chhuaha hma an laknaah Agriculture Officer kalkhawmte chu lawmthu a hrilh pahin heng zawng zawng lo thlen theihna hi kuthnathawktute nena thawhhona tha tak an neih vang a ni a ti bawk. A sawizelnaah Minister chuan Agriculture Officer-te chu tum mumal tak neia hna thawk zel turin a chah a, thawhhona tha leh inrintawnna nei a, anmahni nun pawh veng uluk turin leh Agriculture chu mite nun khawchhuahna atana hman tlak ni tura siamtu an ni tih inhre reng turin a chah nghal bawk. India President kut atanga “Krishi Karman Award” an dawn chungchang pawh sawi langin, heng lawmman an dawnte hi kuthnathawktuten phur taka hna an thawh zel theih nan lawmmanah pek chhuah leh a ni ang a ti bawk.

Khualzahawm Pu K.S. Thanga pawhin Agriculture Officer-te chu Sorkarin NLUP leh Agriculture Department hmang tangkaia tlangram loneih a lo tlakhniam zel theihna atana hmanraw tangkai taka an tang chu lawmawm a tih thu a hrilh a, hei hi Mizoram Sorkar pawhin a hre reng a ni a ti. A sawi zelnaah Pu K.S. Thanga chuan kum 4 chhungin khawltha hmangin tha thar nuaih chuang siam thar a ni a, hetiang zela kal a nih chuan intodelh tura Buh thar kawngah pawh nasa taka hmasawn zel a beisei thu a sawi lang a. Oilpalm chungchang pawh sawi langin – hun reiloteah Oilpalm avangin Mizoram-a kuthnathawktuten hmasawnna duhawm tak an hmu thuai dawn a ni a ti bawk.

Pricipal Secretary Pu Lalram Thanga pawhin Agriculture Officer-te chu intuaihriam reng turin leh an thiamna thar zelte chu mipuite hnena chak taka thlen thin turin leh anmahni pawh khawvel thiamna thang zel mila ke pen ve zel turin a chah nghal bawk.