Khawvela Home Furnishing Company lar leh lian ber zing a mi, IKEA chu Mizoram rua leh mau pawisa a chantir turin Chief Minister hmalakna in Mizoram a lo lut dawn ta. Rua leh mau, changel kawr leh thing tha te hmanga inchhung bungraw chi hrang hrang siamchhuahna atanga kum 1-a cheng tluklehdingawn 238 vel hui lut mektu, India ram atang ngawt pawha kumtin cheng vaibelchhe 2300 chuang man furniture ilo lei thin tu, IKEA hian tun hnaiah rua leh mau atanga bungraw siam sa lei chu namen lo a tihpun a tum a. Tunhma a an tih dan thin, an ram luh tharna a Industry lian pui pui din chu ti tawh lovin, an duh ang siam thei tur nen a partnership siam an duh a. Mizoram chhunga chutiang lam hawi Industry din duhte partner atan an duh a. Hetianga thawh hona tha tak nei tur hian Mizoram sawrkar hotu Chief Minister sawmna angin IKEA hotute Mizoram-ah an lokal dawn a.

IKEA Project Head, Pu Rajasekhar Warrier-a chu Febuary kar hnihnaah Aizawlah lo kalin 11th Febuary 2016 hian workshop Mizoram sawrkarin a buatsaih sak anga. He workshop hi Chief Minister in a tel pui ang. He workshop-ah hian Changel, Rua leh Mau industry din duhte nen an thawh ho dan turte, Mizorama an thawhpuite hnen atanga IKEA beisei/phut te, leh Bank dawrna tur leh an product lei sak zar zar na tur atana Buy Back Agreement an siam dan tur leh thil tul dang te inzirtirna hun, zawhna zawh hun hman a ni ang.

IKEA hian Mizorama an Partner-te hnen atang hian an product mamawh tur chi, an duh zat te leh a rate te hre sa vekin an leisak thei dawn a. Mizoram a Industry a hlawhchham fo thin nachhan pakhat, thil siam chhuah hralhna, market-a access nasa taka a tih bo theih avangin Mizoram Economy tan hun thar a hawn theih ngei beisei a ni.