Vawiin khan Health Minister Pu Lal Thanzara, Aizawl North III bialtu MLA leh Disaster Management & Rehabilitation (DM&R) Minister Pu C.Ngunlianchunga-te chuan Rangvamual tawn tirh national highway kawngpui min thin enfiahin fur chhiat laia kawng a tlang reng theih nana hmalak dan tur an rel.

He kawngpui hi a pawimawh em avangin a tlang reng a tul a. Fur ruahtui tam hun a thlen hma in a him china kawngpui zauh te, lei tla thei mai tur ven leh lei nghet lo zual thenfai hna thawh chu thuai tum a ni a. DM&R department chuan he hna tul zualpui hi contractor-te kaltlangin an thawk dawn a ni. Rangvamual leimin hi PWD National Highway lamin a vai a theinfaina tur estimate a siam tawh a, department engineer-te hmuh dan chuan tun dinhmunah a leimin awih zual hi khawih chet ngam a la ni lo a, a ko awih zual chu khawl hmang lova mihring tha a siam rem tha an ti a. Leimin nasa zawk a thlen loh nan a awih zual khawih chelo thei ang bera hnathawkin, kawngpui pawh laih zau belh vak rihlo tha in an hria a ni.

Aizawl atanga Airport pana tlan thlaka Aizawl hnaih lam, leimin tawntirh leh a tawp lam, Lengpui Airport hnaih lam a kawngpui zim lutuk, lirthei insulpel hlei theilo khawpa chep chu a him chinah lirthei insulpel thei tur khawpa zau a laih tum a ni a. Khawl nghawrin lei a tih min belh a hlauhawm avangin ko panga lei thawl zual leh tla mai thei tur chu mihring tha hmanga paih fai a, a tlak belh vengtu tur leh a tla apiang funna tur lungfun (gabion) siam tha an ti bawk.

Minister pahnihte chuan Rangvamual thenfai hna hi a hmanhmawh thlak tawh em avangin bul tan thuai ni se an ti a. Traffic nen inbe remin February 10, Nilaini zan atanga hna thawh tan nghal turin ruahmanna siam a ni. Ruahman lawk dan chuan Nilaini atang hian zan dar 8 atanga zing dar 6 thleng, zan tin hna thawkin hemi hun chhung hi chuan lirthei eng chi mah tlan tlang phal a ni dawn lo.

Minister-te hi DM&R Secretary Pu PC Lallawmsanga, DM&R Director Pu Lalpeksanga leh engineer-ten an tawiawm a ni.