Vawiin khan February ni 8 leh ni 9, 2016 chhunga neih tur Training cum Sensitization Workshop on Disability Rehabilitation chu Aijal Club-ah Social Welfare Minister Pu PC Lalthanliana’n a hawng.

Khuallian Pu PC Lalthanliana chuan National Institute for Empowerment of Persons with Multiple Disabilities (NIEPMD), Chennai, Zoram Entu Pawl (ZEP) leh FIWDC-Peace Home te’n chuti ang training an buatsaih chu lawmawm a tih thu a sawi a. Sawrkarin rualbanlote tan theih tawpa hma a lak zel thu leh Commissioner for Persons with Disabilities hial a dah thu sawiin, sawrkar building-ah te Ramp siam mek zel a nih thu leh Secretariat-ah pawh rualbanlote tan liau liau Lift siam a nih thu a sawi bawk. Rualbanlohna tihtlem a nih theih nan a tir te atanga hma lak (Early Intervention) a pawimawh thu sawiin, Minister chuan an chenpuite chu an pawimawhzia hre chiang turin a chah a. Sawrkarin rualbanlote tan hamthatna hrang hrang duangin Disabled Pension Scheme a kalpui thu leh NHF loan pawh interest tlem tea a pek thu sawiin, Workshop chuan rualbanlote tan hmasawnna leh tangkaina tam tak a thlen a beisei thu a sawi bawk.

Dr. A. Amarnath, Coordinator, NIEPMD chuan India ram hmun hrang hranga rualbanlote tihhmasawn nan NIEPMD-in kawng hrang hranga hma a lak thu sawiin, Multiple Disabilities chungchangah Ministry of Social Justice and Empowerment, Govt. of India hnuaia kum 10 chhung hna a thawh tawh thu a sawi a. He Workshop hian khawtlangah danglamna thlenin, rualbanlote chungchanga mipui rilru puthmang tam tak a thlak ngei a beisei thu a sawi bawk.

Samuel Zothantluanga, Coordinator, Zoram Entu Pawl chuan Workshop hawnna Programme hi a kaihruai a. Rev. Fr Lawrence Kennedy, Director, Zoram Entu Pawl chuan inlawmna thu sawiin, Sr Maria Goretti Sangma, Director, FIWDC-Peace Home chuan lawmthu sawina nen a titawp a ni.

He hunah hian sawrkar Department aiawh te, Aizawl City Local Council hruaitu te, NGO hrang hrang te, College zirlai te leh rualbanlo kaihhnawih pawl hrang hrang te an tel a ni.