Tukin zingkarah khan Assam Riffles Lammual ah khawvel hmundang te rual in International Yoga Day vawi 2-na chu ruahsur karah Yoga insawizawina phurpuitu ten an hmang a. He hunah hian Mizoram Governor Lt. Gen Nirbhay Sharma (Retd.) chu khuallian niin Yoga Excercise ah hian a tel ve a ni.

Aizawl khawpui a Internationa Yoga Day vawi -2 na hawngtu, Mizoram Governor Lt. Gen Nirbhay Sharma (Retd.) chuan Mizoram mipui te chu hriselna kawngah tun aia nasa zawka inzirtir nise a duh thu a sawi a. Infiammi ni lo tan pawh awlsam taka tih ve theih, Yoga chu insawizawina chi khat hriselna kawng a mihring taksa nasa taka pui theitu a ni a ti a. Yoga chu excercise thianghlim, sakhuana thil avanga hlauhthawn awm loh leh khawvel ram hrang 200 chuangah sakhaw hrang hrang vuantu ten a thatzia an hriat tawh avanga an phurpui mek a ni a ti.

Mizoram-ah pawh hmundang ang thovin khawsak phung inthlak vang leh eizawnna a lo dan tak avanga natna lo awm- Thisen sang, zunthlum leh hrisellohna kawng hrang hrang te a tam tak thu a tarlang a. Taksa insawizawina hrim hrim Mizoram mipui ten ngai pawimawh thar leh se a duh thu sawiin Yoga pawh hlauthawng mai lova hmang chhin tur in Mizoram mipui te a chah a ni. Amah ngei pawh Yoga hmanga a insawizawi thin thu sawiin a thatna tamtak a tel tawh thu a tarlang a. Sakhuana leh rinna khawih pawi thei thil a nih loh bakah ruihlo, zuk leh hmuam a harsatna nei te an harsatna sutkian sak thei taksa insawizawina thianghlim a ni a ti.

39 Bn Assam Riffles Gound a International Yoga Day vawi 2-na programme hi Assam Riffles Headquarter leh 23 Sector Assam Riffles Headquarter tangkawp in an buatsaih a ni a. Brig. MS Mokha, DIG, 23 Sector AR leh Col. Arjit Mukhopadhyay, Commandant 39 AR ten Governor hi lo dawngsawng in he hunah hian Yoga hmangtute, Assam Riffles, BSF, CRPF, Armed Forces, CYMA, NIT, NSS, NCC leh AYUSH atanga rawn tel mi 1000 chuang in Yoga hmanga insawizawina hun an hmang a ni.