2098/2026-2027

Dated Aizawl, the 7th September 2026: India rama kum tina hman thin, "Eye Donation Fortnight" vawi 41-na chu vawiin khan Taxation Department Auditorium, MINECO-ah hman a ni a. National Programme for Blindness & Visual Impairment, NHM bultuma neih niin, H&FW Department Principal Director Dr. Lalthlengliani chu Khuallian a ni.

Khuallian Dr. Lalthlengliani chuan Eye donation chu kan thih hnua kan mit darthlalang (Cornea) mi dangte tana mit varna a lo nih theihna tura pek hi a ni, a ti a. Khawvel hmun hrang hranga Eye Bank a lo indin chhoh dan leh India rama a awm ṭan dan te sawiin, Mizoramah pawh July ni 31, 2008-ah Eye Bank hawn a ni a, September ni 25, 2009 ah Corneal Transplant hmasa ber hlawhtling taka neih a ni, a ti. Central Sorkar ruahmannain kum tin Eye Donation Fortnight (25th August to 8th September) hman thin a ni a. Mizoramah pawh midangte tana malsawmna ni turin mi tinin ṭan kan lak lehzual a tul a ni, a ti.

Civil Hospital, Aizawl, Eye Specialist, Dr. Zoremmawii, chuan PowerPoint presentation hmangin Eye Bank hnathawh hrang hrang te, mit donate dan te leh a him thu te a tarlang a, kalkhawmte mit donate zel turin a sawm bawk.

Inkhawm kaihruaitu, NHM Mission Director Dr. R. Lalchhuanawma chuan kal khawmte lawmna thu sawiin, India ram chhungah eye donation kan neih zat leh damlo ten an mamawh zat a la inthlauh nasat thu a sawi a ni.

He programme hmang tura sawm Govt. Higher Secondary School leh MICE school naupang lo kalte atangin Mit donate tura thu tiam 33 an awm a. Kum 2025 - 26 chhunga mit pe mi 67 chhungte hnenah chawimawina thuziak (Certificate) sem chhuah a ni bawk. Kum 2026 – 27 July thla thlengin mit darthlalang (Cornea) hi 42 lak ni tawhin mi 23 thlak sak an ni tawh bawk.

Aizawl Civil Hospital-a Mizoram Eye Bank-ah hian mit donate tum in-register tawh mi 9312 an awm a. Mit dawng tur in-register hi mi 400 an awm tawh bawk. Thih hnua mit pe tawh hi mi 632 an ni. Kumin National Fortnight on Eye Donation hun chhunga mit donate phal, pledge chhang zawng zawng nen chuan mi (9312+33) 9345 an awm tawh a; mit donate, pledge chhang duh hi mi 20 chin an awm chuan a hmunah thawktu ten an pan thei reng a ni. Hrechiang duh tan 0389-2324564 (Toll Free) ah hian zawh chian theih a ni.