Vawiin khan India ram pumah Republic Day vawi 69-na lawm a ni a, Mizoramah pawh hmun hrang hrangah lawm a ni. Aizawlah chuan Lammualah hman a ni a, Mizoram Governor Lt. Gen. Nirbhay Sharma PVSM, UYSM, AVSM, VSM chuan zing dar 9 khan hnam puanzar a pawt pharh a. Parade contingent-te a endik hnuin, hnam puanzar chibai an bûk a chháng lêt. 

Governor chuan India ramin zalenna a neih theihna tura nunna hlu tak hlantu hnam pasaltha te, mipuite duhthusam leh beisei te chu hre thar leh ila a ti a. India chu khawvel ram ropuite zinga tel tura ke a pennaah kan ram mipui rorelna kalphung leh a hlutna te chu vawnghim a, tichak deuh deuh turin i inhlan thar leh ang u, a ti. Remna leh muanna chu hmasawnna atana pawimawh hmasa a nih thu sawiin, Mizoram India rama State ralmuang ber nih chhunzawm tura dan leh thupek kengkawhtute leh khawtlang inpekna chu a fakawm a tih thu a sawi a. Sawrkar department hrang hrang te hmalakna a tarlang bawk a ni. 

New Land Use Policy (NLUP) chuan kum reilo te chhungin ei leh bar, sum leh pai dinhmunah hmuh theihin ram hmel a tidanglam a ti a. NLUP hmalakna avangin Mizoram chu UN Global Environment Facility (GEF) Project-ah India rama state panga thlan chhuah zingah telh a ni, a ti. Sawrkar chuan agriculture tihhmasawn chu market economy neihna atana a ngaihpawimawh thu sawiin, kan thar chhuah tipung turin NLUP, NEDP leh Central scheme hrang hrang hmanga hmalak mek te chhunzawm a nih bakah ram leilung hanna chauh hmanga thlai thar chhuah, certified organic products tihlar nan Mission Organic Value chain Development (MOVCD) for North Eastern Region chu a kalpui mek thu a sawi a ni. Mission for Integrated Development of Horticulture (MIDH) leh NEDP hnuaiah horticulture thlai chi hrang hrang tam tham tak chin a nih thu leh RKVY leh NLUP hmangin hmun tam takah sangha chi buatsaihna leh sangha khawina dil siam belh a nih thu a sawi a ni. 

Governor chuan mipuiin buhfai ei tur hnianghnara an hmuh theih nan sawrkarin hma a la a ti a. Langtlang taka sawrkar hnathawh dan mipuiin an hriat theih district office, supply kudam, depot-te leh ration card zawng zawng te computer-a chhinchhiah  leh thlunzawm (digitalize) hna pawh thawh zawh a ni, a ti. Kum 2017-2018 chhung khan State Roads project hnuaiah kawngpui thar paruk, a zavaia belhkhawmin kilometre 77.35 sial a ni a ti a. India rama road project lian ber, cheng vaibelchhe 6167.58 senna tur Aizawl-Tuipang kawngpui NH-54 siamthat, zauh leh tihlen hna chu sawrkar laipui chuan National Highway & Infrastructure Development Corporation Ltd. (NHIDCL) hmangin a thawk mek a ni, a ti. 

PHE department chuan in 3,293 hnenah tui connection pe in kum 2017-2018 chhungin thingtlang khaw 38 tuam chhuak turin ruahmanna a siam a ti a. Mimal inthiarna, Individual Household Latrines (IHHLs) 19,656 sak a nih tawh  thu sawiin, district pali - Aizawl, Champhai, Kolasib leh Serchhip  te chu Open Defecation Free (ODF) district ah puan an ni tawh a ti a. District dangte pawh kumin chhunga puan hman tura beisei an nih thu a sawi a ni. Mipui hmalakna “Save Chite Lui” chu chhuanawm a tih thu a sawi bawk. 

Lt Gen. Nribhay Sharma chuan Tuirial Hydro Electric Project atanga kawlpetha hralh thei tura peih tep a nih thu a sawi a. MW 210 pe chhuak thei tur Tuivai Hydro Electric Project thawhna turin North Eastern Electric Power Corporation (NEEPCO) leh sawrkar chuan thawh hona thuthlung an ziah tawh thu a sawi  a ni.  Sawrkar chuan mi chanhai leh dinhmun harsa zawkte chawikan leh chhawmdawl a ngai pawimawh a ti a.  Durtlangah hmeichhia kum 18 te tan One Stop Centre (OSC) building sak mek niin, ST Girls Hostel 13 sakna tur central sawrkar in a sanction zingah 10 sak zawh tawh a ni, a ti. 

Governor chuan hmasawnna tluan tling nei turin zirna tih hmasawn leh thalaite thiamna tuai hriam chu  thil pawimawh hmasa ber te zinga mi a ni a ti a. Mizoramin Sainik School a neih thar tak bakah ram pum huapa hmeichhiate tana Sainik School admission hawng thei hmasa ber a ni chu chhuanawm tiin,. Chhingchhip khaw mipuite a fak a ni. Hmun kilkhawr zawka chengte dinhmun khai chhuah nan lehkha ziak leh chhiar thiamna chu eizawnna tlaka chhawr thei turin nasa zawka tan lak a la ngai hle a ti a. Hemi kawngah hian Autonomous District Council pathumte a bik taka ngaihsak an ngai a ni, a ti. 

Damlo te inenkawlna tichangtlung turin sawrkar chuan Falkawn-a Mizoram Institute of Medical Education & Research (MIMER) din nan post thar  629 siam  a remtih thu a sawi a. Zemabawka Mizoram State Cancer Institute chei that leh tihlenna tura ruahmanna chu Ministry of Health & Family Welfare pawhin pawmin, hna thawh tan tawh a nih thu a sawi a ni. Sawrkarin Mizoram Against Drugs, Alcohol and Tobacco (MADAT) programme a kalpui leh Assam Rifles leh tlawmngai pawlten Healthy Mizoram Campaign an kalpui te chu mipui thlawp turin a sawm a ni. Chak taka infiamna lama hmasawnna ruhrel dinte chuan kan ram tan rah tha a chhuahin kum kalta chhung khan Mizoram atanga infiammi ten chawimawi hrang hrang an rawn hawn a ti a. Sawrkar chuan sik leh sa inthlak danglam chak takin kan chhehvela thing leh mau, nungchate a nghawng dan hria in a vei hle a ni, a ti. 

Governor chuan Mizo hnam ziarang leh hnam rohlu humhalh leh chhawm nun kawngah sawrkarin hma a la chhunzawm reng a ti a. Maubuang khua ah North East Zone Cultural Centre (NEZCC) Regional Centre sakna tur chu ram enfel tawh niin a sakna tur ruahmanna siam hmabakin a awm mek a ni, a ti. Mizoram chu India ram chhunga mite chauh ni lo, khawvel ram zau zawka khualzin te hip turin nasa taka tan lak a ni, a ti a. Tun hnai khan Indian Chamber of Commerce (ICC) chuan Mumbai-ah Business Summit a buatsaih a. Maharashtra sawrkar chu Mizoram sawrkar nen tourism, horticulture leh agriculture ah te thawk dun turin a inhawng hle tiin, kumin Chapchar Kut lawm lai nena inrual turin Summit leh Road Show Aizawlah buatsaih tum a ni, a ti bawk.

Hmasawnna huapzo leh tluantling nei turin a chhawr tangkaitu mipui ten sawrkar thiltum leh hmalakna te an hriat a, ram hmasawnna kawngah a tam thei ang bera mipui an tel a pawimawh a ti a. North Eastern Council (NEC) atanga sum hmuh cheng vaibelchhe 10 hmangin multi-facility centre project “Lianchhiari Run” sak hna kalpui tan mek a nih thu a sawi a ni. Hmasawnna kawngah Mizoram chuan thui tak ke pen tawhin, hmabak thui tak kal tur a la nei a ti a. Ram eichhetu ruihhlo chu nasa taka kan do a, kan thalai lehkhathiam rual ten eizawnna an neih theih nan leh sumdawnna kawngah an thiamna leh finna te an hman tangkai theih nan ruahmanna tha a pawimawh a ti. Mizoram mipui, tlawmngaipawl leh sakhaw hrang hrang ten sawrkar an tawiawmnaah lawmthu a sawi bawk a ni. 

Ceremonial Parade hi Parade Commander DSP Pu C. Lalsawta leh 2nd Parade Commander DSP Pu Henry Malsawmtluanga ten an kaihruai a. Armed contingent 6, Unarmed 5, School Contingent 14 leh Pipe Band 4 te an tel a ni. Republic Day lawmnaah hian Governor chuan Governor’s Gold leh Silver Medal police mi panga hnenah a sem a. Parade contingent titha te hnenah lawmman a hlan bawk a ni. Lammuala lawmna inkhawm zawhah hian Raj Bhavan-ah sawm bikte tan ‘At Home’ programme-in a chhunzawm a ni.