Kum 2011 atanga rampumah kum tin October ni 5-12 chhunga hman thin ‘RTI WEEK’ chu kuminah pawh state zawng zawngah hman leh theuh a ni a. Mizoramah pawh district hrang hrangah ‘RTI WEEK’ vawi 3-na hi hman a ni a, he Week puala inkhawmah te hian sorkar department hrang hrang te bakah tlawmngai pawl, kohhran, zirna in, political party leh media hrang hrang te nen RTI Act zirchianna hun hman a ni.

Right to Information (RTI) Act hi Sweden leh Finland ramah hman tan hmasa ber a ni a. India ramah chuan kum 2005 May ni 11 khan Parliament-in RTI Act a pawmpui hnuah India President chuan June ni 15, 2005 khan a hming a ziah hnan leh ta a. Gazette of India-ah June ni 21, 2005 khan chhuah a ni a, October ni 12, 2005 atang khan rampumah hman nghal a ni. Hemi hma hian a hnuaia state-te chuan RTI Act hi an lo hmang tan tawh reng a, chungte chu : Goa (1977), Tamil Nadu (1977), Rajasthan (2000), Delhi (2001), Maharashtra (2002), Assam (2002) leh Madhya Pradesh (2003). Jammu & Kashmir state chuan anmahni dinhmun milin RTI Act hi kum 2004 khan an hmang tan tawh bawk a ni.

Mizoramah chuan Section 15(1)-in thuneihna a pek angin Notification No.F.13011/11/2005 IPR dtd. 29th June 2006 hmangin ‘The Mizoram Information Commission’ (MIC) chu din tan a ni a. Section 15(2) chuan Chief Information Commissioner leh Information Commissioner post-te siam a phalsak bawk a ni. Tuna Mizoram-a Chief Information Commissioner post chelhtu chu Pu Lal Dingliana IFS (Rtd) a ni a, Information Commissioner chu Pu L.Hrangnawna, IPS(Rtd) a ni.

Mizoram Information Commssion-in a tarlan danin kum 2006 atanga kumin September, 2013 thlenga zawhna lut zawng zawngte chu hetiang hi a ni :

Nikum March 2012 atang khan Mizoram Information Commission chuan National Federation Information Commission of India a zawm ve ta a, amaherawhchu NFICI-ah hian ramchhung state zawng zawnga Information Commission-te chu an tel vek kher lo a ni. Mizoram Information Commission chuan tun hnai khan website thar a hawng bawk a, hetah hian RTI Act chungchang zawhna zawt duh emaw hrechiang duh emaw, mi tupawhin engtiklaiin an zawt/en thei a ni : www.mic.mizoram.gov.in.