Chief Minister Pu Lal Thanhawla, Delhi-a a chamchhung, June ni-11 khan Pu S. Ramadorai, Chairman, National Skill Development Agency, Government of India nen Mizoram House-ah inkawmna tha tak an nei a.
He inkawmna ah hian Pu Lal Thanhawla chuan skill development chungchang a Mizoram Skill Development Society chu ‘nodal point’ a hman a nih dan leh he Society hotu atan a Member Secretary, State Planning Board ruat anih dan te Pu Ramadorai hi a hrilh a ni.
Scheme dang bakah Chief Minister chuan red palm oil chu Godrej Company nen a tanghoa chin leh process anih dan leh tung oil, rawng siamna atana tangkai tak, tun dinhmuna Malaysia leh ram dang atanga chawk luh ngai, chin thar leh anih dan te a sawi chhuak a; Pu Ramadorai pawhin hemi kawngah hian rawng siamtu Company lian Asian Paints pawh tangkai zawka an tel theihna kawng lo dapzui a tum thu a sawi.
Pu Ramadorai chuan Aizawl ITI leh Tata Motors ten ‘technical infrastructure’ tih changtlun na tura an thawhdunna chungchang sawiin, he programme hi thla thum (3) hnuah chuan zawh theih beisei a ni a ti. Hei hi zawh a nih hunah chuan Driver te leh Motor Mechanic te chuan Tata Motors kaihhruaina hnuai ah training programme tha tak neiin, hlawh tha tak hmuh theihna an nei dawn a ni. Hetiang skill training hi Assam ah leh Shillong ah te pawh neih mek a ni a, Aizawl ITI ah hetiang hi kalpui anih hnuah Mizoram ITI dangah te pawh tan ve zel a ni ang, Pu Ramadorai chuan a ti.
Mizoram Skill Development Society (MSDS) aiawh, he inkawmna a tel ve chuan Mizoram chu lehkha ziak leh chhiar thiam tamna anih avangin College-level a vocational training neih tha a tih thu leh MSDS chuan Tata Institute of Social Sciences-School of Vocational Education (TISS-SVE) nena thawhho a duh thu a tarlang a. He programme hnuaiah hian zirlaite chuan factory ah ni 5 chhung an thawk a, a ni 6-na ah training pangngai pek leh an ni. A training hi a thlawn a nih bakah zirlaite chu ‘stipend’ pek an ni a, course an zawh veleh Vocational Graduate degree pek an niin, hna tha zawk hmuh na remchang tak a ni.
Pu Ramadorai chuan he Tata Institute of Social Sciences (TISS) Governing Body-a Chairman anih sawilang in, MSDS hmalakna turah pawh theih tawp a a puih tur thu a sawi. MSDS aiawh chuan foreign company te nena Mizo thalai te training dan tur dap mek anih thu leh Bhullar Education Services (Australia) nena Memorandum of Understanding, (MOU) sign thuai anih tur thu te sawiin, a bik takin ‘welding’ training zawh a Australia atanga Certificate dawn a nih theih dan te, training zo te tan Australia leh Middle East (Kuwait, Saudi Arabia, etc.) ah te hlawh tha tak tak hmuh a awlsam dan te sawi a ni. Pu Ramadorai pawhin thalai ten foreign a hna an hmuh theih nana training programme, Ministry of Overseas India Affairs (MOIA) in a siam thu leh hemi atan hian Rs. 20 crores dah hran a nih thu a sawi.
He inkawmna a Chief Minister tawiawmtu Mizoram officer te pawhin ‘self-employment’ atana skill training, a bik takin agro-forestry te, rua leh mau hman tangkai na lam a pawimawh zia te leh mahnia hmala duh te puih nan ‘micro-financing’ a tul dan te an sawilang bawk.
