Vawiin khan Horticulture Minister Pu P.C. Lalthanliana’n ni nga awh ‘Horti Fair’ chu Assembly House Annexe Basement Seminar Hall-ah a kharna hun a hmanpui. June ni 9 atanga ni 13 thleng neih Horti Fair hi tum thum neihna niin, thlai leh pangpar leh a chinna hmanraw hrang hrang zawrh bakah, kuthnathawktu thlan bikte tan seminar neih a ni bawk.

Horticulture Minister chuan ‘Horti Fair’ chu hlawhtling taka zawh a ni chu lawmawm tiin, a buaipuitute zawng zawng hnenah lawmthu a sawi a. Mizoram hi a ram leilung leh sik leh sa awm dan han thlirin industry lian beng bung bun a intodelh tur ai chuan, thing leh mau, thei rah leh thlai lama eizawng tur awm tak kan ni, Minister chuan a ti bawk a. Hemi kawnga hmasawn tur chuan Sorkar hmalakna ringawt chuan awmzia a neih dawnloh thu leh, thahnem ngai taka sorkar tawiawm a, state intodelh a Mizoram siam turin kalkhawmte chu a sawm nghal a ni.

Horti Fair hi kuthnathawktu ten a hun taka thlai tiak, a chi leh mamawh dangte an neih theih nan leh, hralh chhuah tur neiten hralhna tur an hmuh theih nan siam a ni a. Kumin hian dawr (stall) 70 awmin, June ni 13 chhun dar 12:30 thleng khan cheng 12,47,142 lei chhuah a ni a. Fair neih chhung hian district tin atangin Progressive Farmers 10 theuh thlanchhuah te tan seminar buatsaih a ni bawk.