Socio-Economic and Caste Census (SECC) 2011 Draft List chu 25th June, 2014 hian khaw tinah tarchhuah a ni dawn a. Hemi chungchangah hian sawisel duh leh thun belh/ paih ngai chungchangah hriattur pawimawhte inhrilhhriatna hun “State Level Workshop for BNVs on SECC Claims and Objections” chu vawiin khan State Institute of Rural Development in I&PR Auditorium-ah workshop buatsaih a ni.

He SECC (BPL Census ti a sawi lar) Draft List tarchhuah a nih atanga ni 10 chhungin sawisel duh nei leh tello telh belh ngai leh paih ngaite an awm a nih chuan Gram Sabha-ah sawiho tur a ni a. Complaint hi khaw tinah Village Level Officer-te hnenah Draft List tarchhuah atanga ni 21 chhung thehluh theih a ni.

Vawiin workshop buatsaihah hian Mizoram khaw tin atangin BNV/VLA te an tel a. SIRD Director Pi Maria CT Zuali’n a hmanpui bakah Nodal Department GAD atangin Under Secretary Pi Zonunthari a tel bawk a, Resource Person Dr. Nilawma, Associate Professor MZU in BNV/VLA-te zirtirna hun a hmang bawk.