Vawiin khan Mizoram Cooperative Apex Bank Ltd. Zobawk Branch chu Parliamentary Secretary Pu Joseph Lalhimpuia chuan a hawng. 

Pu Joseph Lalhimpuia chuan hun rei tak atanga Zobawk mipui ten an nghahhlelh Apex Bank Branch, Zobawk-a hawn a ni ta chu bialtu MLA a nihna angin a lawm thu a sawi a. Bank chu sumdawng an nih angin mipuite tana dawr nuam tur a ni, a ti.  Khawtlang in hman tangkai tum turin leh thawktute harsatna ah puih turin a chah a ni. Zobawk a hmasawnna hrang hrang thenkhat tarlangin PHC sak mek chu hun reilote ah sak  zawh a beisei a, NABARD in Education Department hnenah Vaibelchhia 25 a pe a, Zobawk High School chu Cheng Vaibelchhe 1 sena sak that a ni ang a ti. Higher Secondary School pawh Village Council te tanrualna leh hmalakna in a kal mek a, result tha tak an neih thin avangin lawmthu a sawi a ni. Khawtlang tana hmasawnna kawngah lungrual taka thawk ho turin a chah bawk a ni. 

Inkhawm hi Mizoram Cooperative Apex Bank Ltd. Chairman Pi T. Lalmuanpuii chuan kaihruaiin kalkhawmte lawmna thusawiin Mizoram Cooperative Apex Bank hi kum 1982 atanga bul tan a ni a, Zobawk Branch hi Branch 17 na a ni a. Mizoram Sorkar hian fa tak angin min enkawl a, ka hun chhung hian Minister leh MLA ten thuneihna hmanga Loan lo ziah sak an la awm loh thu a sawi a ni. Thingrem mawng a pawisa in dah that te kha Apex Bank ah chhunglut in hlawkna tel tum theuh turin Zobawk mipuite a chah a ni. 

He Apex Bank hawn takah hian Manager pakhat(1) leh thawktu pahnih(2) dah an ni a, Pu K.Lalrodinga, VCP Zobawk, Laldingliana Ralte, Vice- Chairman, MCAB leh Pi Thari, Board of Director pawh in thu an sawi bawk. Pu Lalzuahliana, Chief Executive Officer, MCAB in lawmthu sawina a nei bawk a ni.