Ni li (4) chhung awh tur Mizoram Art Development Society (MADS) buatsaih Annual Art Workshop chu vawiin atang khan Aizawl Art Gallery-ah tan a ni. He Workshop hi Information & Public Relations Department bultum niin, a hawnna inkhawm tawi buatsaihah Pi Lalnithangi, MIS, Joint Director, I&PR chu khuallian a ni.

Pi Lalnithangi chuan lemziak leh lemtuk chu kan awm tawhloh hnu ah pawh ngawi renga thu puangchhuaktu an nih thu leh, heng kan artist-te kutchhuak hi khawvel ram zau zawkah pawh kan Pipute hunlai atanga tunlai hun thlenga Mizote nun phung leh culture phochhuaktu a nih thu a sawi a. He lama tui mite thawhhona mumal tak lo awm ta chu thil chhinchhiahtlak tak a nih thu leh, MADS chu thalai tam tak nun kawng tha zawka lemziak hmanga kaihruaitu an ni chu lawmawm a tih thu a sawi a. MADS leh I&PR Department chu thawhhona tha tak an neih zawm zel a beisei thu a sawi bawk.

Art Workshop-2016 hawnna hi Pu Laltanpuia, MADS President chuan kaihhruaiin, Pu Vanlalhriata, General Secretary chuan report tawi a pe a, Pu HK Jerry Ramliana, Vice President, MADS chuan lawmthu sawiin hun a khar a ni.

Art Workshop hi vawiin atangin Zirtawpni (29.07.2016) thleng neih a ni dawn a. Mi 35 tel turin an inziaklut a. Lemziah (water-colour, oil, acrylic, pencil, charcoal) leh Lemtuk / Sculpture (Wood) ah te workshop hi neiin, a khar ni hian hemi hun chhunga an kutchhuak te hi a duh apiang en theih turin pholan a ni ang. MADS hi kum 2012, July khan din tan niin, tunah hian member inziaklut 76 an awm tawh a. Workshop bakah exhibition hrang hrang (Solo, Duet and Group-te) vawi engemaw zat neih thin a ni tawh a. Aizawl Art Gallery hi engtiklai pawhin a duh apiang tan tlawh theih a ni a. Lemziak leh lemtuk-te hi inbiakremna in a lei theih hlawm a ni.