Nimin khan Mizoram State Legislative Committee on Estimates chuan Zuangtui a Export and Import Business Training Centre sak mek leh Sairang ram chhunga Bamboo Technology Park hmunhma te an tlawh a. Heng hmun pahnih siamna leh enkawlna atana sum hmuh tawh atanga hmanralna hrang hrang te zirchianna neiin estimate nen a inmil em tih te an endik a. Committee member-te chuan an thil hmuhte behchhan hian an thutkhawm leh hunah thutlukna siamin a tul anga sawrkar hnena rawtna leh thurawn thlen an tum a ni.

Committee on Estimates member nimin a BDA hmalakna endik tute hi chairman Pu Lalrinliana Sailo, MLA; Pu Vanlalzawma, MLA; ZOHANCO Chairman Pu R.Vanlalvena, MLA; MYC Chairman Pu T. Sangkunga, MLA leh Mizoram Women Commission Chairperson Pi Vanlalawmpuii Chawngthu, MLA te an ni a. Export and Import Business Training Centre leh Bamboo Technology Park enkawl leh sak chungchanga mawh latu Bamboo Development Agency (BDA)hotuten an lo dawngsawng a ni. Estimate Committee member te chuan Assembly committee hrang hrang te hriat duh zawng te department ten ngaipawimawh se tha an tih thu an sawi a. Zawhna in ang chhanna dang fo mai te hi thil fel lo tak enchian ngai thin te a ni a. Thangthar lo la awm tur te an beidawn mai loh nan hleih nei lo leh dimdawi bik nei lemlova ram hmasawnna tur a nih phawt chuan hma an lak zel tur thu an sawi a ni. Building tha tam tak rampa lailenga sum tak tak senga sak tak te chu Minister leh hotu lian zawkte thurawn petu official-te ruahmanna fumfe tawk loh vang a ni fo thin a. Hmathlir thui tak nei mithiam-te, hlawh nei a sawrkarin a chhawr te hian ram mipui tam zawk leh kuthnathawktute chhawr tangkai theih tur thil an rawt chhuah tawh a ngai a ni an ti.

Zuangtui a Export and Import Business Training Centre sak nan hian kum 2010-2011 ah Rs.80,00,000/-, kum 2011-2012 ah Rs.1,35,00,000/-, kum 2012-2013 ah Rs.60,00,000/- leh kum 2013-2014 ah Rs.70,00,000 te dawng tawhin sum hmuh tawh zawng zawng belhkhawm chu Rs.3,45,00,000/- a tling tawh a. Sairang ram chhunga Bamboo Technology Park atana sum dawn tawh hi kum 2007-2008 ah Rs.1,11,10,000/-, kum 2009-2010 ah Rs.55,55,000/- leh Rs.18,00,000/-, kum 2010-2011 ah Rs.67,35,000/- leh Rs.50,000/- leh kum 2012-2013 ah Rs.18,00,000/- te niin a vaia sum dawn tawh chu Rs.2,70,50,000/- a ni.

Estimate Committee chuan Export and Import Business Training Centre sak hna chu tha a ti thawkhat a. Sum hmanna hrang hrang ziah dan erawh enchian ngaiin a hmu a ni. Bamboo Technology Park erawh a tangkaina tur a phawk chhuak lo hle in a hria a, ngaihdan fumfe tak siam turin an la thut khawm thuai tur an sawi a ni. Helai hmunah hian mau hmanga industry dintheihna tur hmunhma(plot) 9 ruahman a ni a. Heng plot 9 te hi advertisement kaltlanga rawn diltute zinga mi 9 hnenah pek(alloted) a ni a. Heng plot chhangtute hian tunthlengin hma an lak tak loh avangin an plot te hi cancel sak leh advertisement pawh chhuah hnan leh tawh a nih thu BDA hotute chuan an sawi a ni. Bamboo Technology Park ah hian transformer 2 bun niin pakhat a tha tawh lova, pakhat zawk fixed charge pawh hmangtu awm lo mahse chawi tho a ngaih avangin power bill la pek tlak loh pawh tam tham tak a awm tawh thu BDA hotute hian an tarlang a ni.