Mizoram khua leh tui duhtak te u,

1. Krismas leh kumthar hun hlimawm tak lo thleng tur kan hmachhawn mek pual hian kan nupa in Mizoram chhunga cheng zawng zawngte thinlung takin chibai leh duhsakna kan hlan a che u.

2. Krismas hi kan hriat theuh angin khawvel pumah Lal Isua Krista piancham anih avangin ropui taka lawm a ni thin a, Pathian atanga lo chhuak hlimna thlentu chi hrang hrang remna leh muanna, induhsak tawnna, inunauna leh inpumkhatna te mitin thinlunga tih thar lehna hun pawimawh tak a ni. Mizorama hlim leh phur taka Pathian fak chung leh ruai pui nena krismas kan lawm dan hi India ram hmun dang dang atang pawhin an hre lar hle a ni. He hun hlimawm takah hian remna, muanna leh hmuingilna kan neih zel theih nan Pathian hnenah i dil nawn fo ang u.

3. India hmarchhak, Mizoram pawh chhiar telin, hian India ram hmasawnna kal mup mup ah hian pawimawhna thuk tak a nei a ni. India Prime Minister Pu Narendra Modi pawhin hmanni lawka India hmarchhak state thenkhat a tlawh tum khan sawrkar laipuiin India hmarchhakin a theihna zawng zawng a haichhuah theih nan, hmasawnna ruhrel a tunlai thei ang ber ber hmanga bul tan a tum thu a lo sawi tawh kha bawhzui nghalin inkalpawhna kawng tha zawk neih anih theih nan Bairabi leh Sairang inkar rel kawng sial hna pawh tan nghal a ni a, hei hian kan state in ei leh bar bakah sum leh pai thawhchhuah kawngah chak takin hma min sawn tir dawn a ni.

4. Thalaite hi kan ram hnuk leh kan vawiin leh naktuk innghahna bulpui ber an ni a, Mizo thalaite hi an chhuanawmin kan ram an tihmingtha thin hle a, India ram chhung state hrang hrang han thlira sawrkar hnathawk dinhmun pawimawh tak tak an chelh hmuh te hi a nuam a ni. Kan infiammiten kumin February thla a 5th NEC Dr.T.Ao Memorial North East Football championship leh March thla a Santosh Trophy an lak kha a ropui kan tiin lawmpuina kan hlan nawn leh a, Olympic lo awm leh hmasa ber tura Mizo thalaite an tel ve ngei theihnan a Sports discipline hrang hrang kaltlanga sawrkar hmalakna pawh hi a chhuanawm hle a ni.

5. Tun atanga ni reilote ah hian kumthar 2015 kan thleng dawn a, hmalam hun eng leh hlimawm tak kan thlir lawk theiin ka hria. Ram leilung hausakna haichhuah tur tam tak kan nei a, boruak thianghlim hip tur kan la neih that bakah ram thla hmuhnawm tak te, nungcha leh ramngaw tha tak ramhmul damdawi chi hrang hrang kan neih te bakah ami chengte kan vengva in thiamna bik chi hrang hrang nei kan ni a, hengte hian kawng tam takah kan state hausakzia a pho lang a, hmasawnna chak lehzual a kalpui anih theih nan a nihna tur ang taka kan hman thiam a pawimawh a ni. Remna leh muanna vawnhim a tihnun zel hi kan zavai a mawhphurhna a ni a, India hmarchhaka kan unaute leh ram chhung hmun dang zawng zawnga chengte nen thukhat vua a lungrualin kan ram ropui tak min thendarh sak tumtute do tlang zel ila, kan ram leh hnam tichak lehzual turin theihtawp i chhuah ang u.

A tawp berah chuan kan nupa in krismas leh kumthar hlimawm tak leh hriatreng tlak hmang turin duhsakna kan hlan a che u.

Kan lawm e. Pathianin malsawm che u rawh se.

Jai hind.