Vawiin chawhnu dar 12:00noon khan AH & Vety Minister Pu C.Ngunlianchunga chuan Saiha District AH&Vety Department ten NLUP hnuaia Piggery Trade thlangtu te hnenah Vawk note an semna Programme ah khuallian niin a hmanpui.

He AH&Vety Department ten NLUP an sem hi NLUP 2nd Phase a 3rd.installment (Final Installment) a ni a, Saiha District khaw hrang hrang khaw 11 atanga lo kalkhawm, Beneficiaries chhungkaw 104 hnenah Vawk Note Pali(4) leh tangkafai Rs.350000/- theuh sem an ni. He Vawk Note hi Champhai atanga lak niin Porcine Reproductive and Respiratory Syndrome(PRRS) hri atanga fihlim vek an ni.

He Programme ah hian Pu C.Ngunlianchunga chuan thusawiin India ram leh Khawvel ramdang ah pawh Mirethei leh pachhe zawk te khaichhuahna tur Sorkar in mipuite tana Programme a duan, NLUP anga tha hi a awm a rinloh thu a sawi. Minister chuan NLUP beneficiaries te chu Bible a Talent tipungtu ang khan NLUP hamthatna an dawn te tipunga ding chhuak ngei turin, rinawm leh taima taka thawk turin a fuih hlawm.

He NLUP semna inkhawmah hian Pu S.Hiato Ex.Minister & Pre.MDCC nibawk te, Pu RT.Zachono CEM, MADC ten thu an sawi bawk a, inkhawm hi Pu Beila Khithie Addl.DC Saiha in a kaihruai a ni.

He NLUP sem zawh hian Minister chuan Saiha District AH&Vety Farm a tlawh nghal a, an Bawng In chu a hluiin a chhe tawh hle tih a sawi a. Minister chuan Saiha District AH&Vety Dept. in kumkhata sum a hmanral hi Rs. 80 lakhs vel a nih laiin Mizoram District hrang hranga AH & Vety Dept. Revenue collect tlingkhawm chu Rs. 40 lakhs vel chauh a nithung a, AH&Vety Dept. in a sum a hmanral leh a dehchhuah inmillo lutuk chu ngaihmawhawm a tih thu leh Kumthar atang chuan kalphung thara AH&Vety Dept. hi kalpui a, Revenue kumkhata Rs. 120 lakhs tal lalut thei tura hmalak an tum thu a tarlang bawk.

Pu C.Ngunlianchunga hi a nupui bakah Lawngtlai atangin Pu C.Lalneihkhuma E.M. LADC, Pu H.Vanlalthaliana E.M. LADC, Pu JC.Ngurluaia MDC te bakah LDCC a hruaitu thahem takin an tawiawm a, Saiha atangin Pu S.Hiato Ex.Minister & Pre.MDCC nibawk te, Pu RT.Zachono CEM, MADC leh MADC a hruaitu te bakah Saiha District Head of Office ten an tawiawm a ni.

Attachment

  • Loading attachment...