Vawiin khan Law & Judicial Department chuan ATI Auditorium-ah Sawrkar tana Court-a ding thin Public Prosecutor leh Additional Public Prosecutor tia hriatte tan intuaihriamna hun ‘Training for Public Prosecutors’ an buatsaih a, he hun hi Law & Judicial Department enkawltu Minister Pu Lalsawta’n a hmanpui a ni.

Pu Lalsawta chuan mipui laka Sawrkar mawhphurhna lian ber zinga pakhat chu mipuiten himna an neih hi a ni a tiin pawikhawihtu chhuina kawngah te, pawi an khawih lohna tura misual dan behte, pawikhawih apiang an phu tawk a hrem a nih theih nan vawiina Sawrkarin thiamna thar hrang hrang hmanga theihtawp a chhuah a pawimawh thu a sawi.

Misual chhui kawngah Police te viak tha in man tur dik tak pawh man thuai thuai thin mahse Court-a misual puhna tur ‘Evidence’ leh ‘Statement’ te a famkim lova, ‘Forensic evidence’ leh ‘Charge-sheet’ te an nih tur an nih phak loh chuan misual chu Court-in a chhuah zalen a ngai fo thin a. Hemi kawngah hian Police, Excise leh Forensic Department Officer te hi dan lama mi thuk an ni bik lova, an tan hetiang chungchang hi hriat vek pawh a harsa a ni a, chuvangin anni leh Sawrkar Public Prosector te an thawhho that lehzual leh an inrawn uluk lehzual a ngai a ni, a ti.

Minister chuan Police leh Investigation khawihtu hrang hrangte’n Court-a ‘Chargesheet’ an thehluh hmain Sawrkar Public Prosecutor te hnenah an lo enpui theih nan entir hmasa thin se tiin a duh thu a sawi a. Thubuai reng rengah thu leh hla a pawimawh hle a tiin a fiahna zawk tur leh a chianna zawk tur a nih chuan ‘Statement’ chu Mizo tawng pawh la thin turin a chah.

Training hawnna inkhawm hi Pu Singthanga, Secretary, Law & Judicial Department chuan kaihruaiin thu hma a sawi a. Dan leh hrai lama mithiam Pu Ziaul Kamal, Assam Sawrkar Public Prosecutor leh Mizoram Sawrkar Additional Advocate General Pu A.K. Sharma te chu resource person niin training hi an neihpui.