Nizan (16.1.2012) dar 5:00 khan 3 March, 2012 ni a Mizoram Bamboo Day hman dan ngaihtuahin Aizawl Club-ah meeting pawimawh tak neih a ni. He meeting hi Pu R.L. Rinawma, IRS in a kaihruai a ni. Thusawiin Pu R.L. Rinawma chuan Mizoram Bamboo Day hi kan hman vawikhatna tur anih avangin hlawhtling thei tur ang bera a hman dan ngaihtuah a tul thu a sawi.

Committee chuan he ni ah hian Aizawl Club ah stall 50 aia tlem lo mau leh a kaihhnawih atanga siam chhuah phochhuahna siam nise tih a rel. Mizoram chhung atang bakah Mizoram pawn atang pawhin stall 10 tal rawn hawn phal sak nise tih a ni. Aizawl pawn atanga lo kal te chu TA/DA pawh a tul anga pek nise tih a ni bawk. Aizawl Club bakah hian Assembly Conference Hall-ah symposium buatsaih nise tih a rel bawk.

He Bamboo day ni ah hian mau nei ngah ber khaw 3 hnenah lawmman pek nise tih a rel a. 1st Prize Rs. 1,00,000, 2nd Prize Rs. 50,000/- leh 3rd Prize Rs. 30,000/0 pek an ni ang. Heng khua te hi E & F Department ten lo thlang se tih a ni. Best Male Bamboo Entrepreneur Award leh Best Female Bamboo Entrepreneur Award siam in citations bakah lawmman Rs, 50,000/- ve ve pek nise tih a rel bawk. Innovative Bamboo Products hnenah pawh citation leh pawisa Rs. 10,000/- pek nise tih a ni. Award for Best Campaign pawh YMA Branch titha te hnenah pek nise tih a rel in, 1st Prize Rs. 30,000/- ; 2nd Prize Rs. 20,000/- ; 3rd Prize Rs. 10,000/- pek tura tih a ni bawk.

Selection Committee of Bamboo Award te chu hemi ni a Award sem lo buai pui tura tih a ni. He Mizoram Bamboo Day ah hian mi zawng zawng tel turin Committee chuan a ngen a ni.