Mizoram Bamboo Development Agency leh National Bamboo Mission Society, Mizoram tangkawpin a buatsaih Mizoram Bamboo Day vawi thumna chu vawiin khan Assembly Conference Hall-ah Khuallian Chief Secretary Pi L. Tochhong chuan hawngin, Pu J.L. Singh, Principal Secretary leh PCCF, E&F Dept. chuan he hun ah hian kalkhawmte lawmna thu a sawi bawk. Kumin Mizoram Bamboo Day hi Chapchar Kut nena inphaman tur leh inpuitawn tura a ni pawh siam rem niin, a thupuiah “Intodelh nan – Mau” (Bamboo for Self Sufficiency) phuah a ni.

Bamboo Day hawnna inkhawmah hian Pi L. Tochhong chuan Mizote nunphungah Mau hi a bet tlat a ni tiin, Mau hman tangkai mai bakah a humhalh kawngah pawh hma kan sawn zel a pawimawh thu a sawi a. Mau hi chhungkaw intundin nan hman tangkai theih, hna ngelnghet siam thei a nih thu sawiin, mau hectare 2 zelah nuai 1.5 bawr vel a lakluh theih tih a zir chiangtuten an chhutchhuah thu te leh, mi taima leh thawk tha peihte tan chuan sorkar pawh a inhawn reng thu Chief Secretary hian a sawi bawk.

Bamboo Day denchhen hian intihsiakna hrang hrang siam niin, vawiin hawnna inkhawmah hian a tithate hnenah Chief Secretary hian lawmman a hlan nghal a. Mau hmanga eizawngtu leh Mau humhalh tha YMA Branch-te hnenah leh, he ni denchhen a LPS nen a tangkawpa Inter College Extempore Speech Competition buatsaih a tithate hnenah chawimawina leh pawisafai hlan a ni.

Bamboo Day pual hian Assembly Secretariat Annexe-ah ni hnih chhung (6-7 March, 2014) awh tur Bamboo Exhibition buatsaih a ni bawk a. He exhibition-ah hian ram chhung leh pawn atanga lo kal ten dawr (stall) 26 hawngin, Mau hmanga thilsiam chhuah hrang hrang lei theih tura phochhuah a ni

Bamboo Day hawnna neih zawhah hian chawhnu lamah ‘Bamboo for Self Sufficiency” tih thupui hmanga seminar buatsaih a ni nghal a.  Pu C. Lalbiakthanga, Executive Director, BDA chuan he hun hi kaihruaiin, mithiam sawm ten presentation an pe a ni.