4845/2024-2025

Dated Hnahthial, the 27th March, 2025: Vawiin chawhma dar 11:00 khan DC Meeting Hall, Hnahthialah Progress Partners under Mizoram Bana Kaih (Handholding) Scheme, 2024 te pualin training buatsaih a ni a. Training hi Pi K.Vanlalruati, Hnahthial Bawrhsap chuan a hawng a ni. He hunah hian Mizoram Bana Kaih (Handholding) Scheme, 2024 dawng tura thlan chhuahte an tel a ni.

Inkhawm hi Pu Zothanmawia Khiangte, Addl. DC chuan a kaihruai a. District Bawrhsap, Pi K.Vanlalruati chuan kalkhawmte chu hmasawnna atana sorkarin a thawhpui tur, progress partners an nih avang te, mahni ke a din tum an nih avang te in sorkar in a ngaij pawimawh thu a sawi a. Theihtawp an chhuah a tul thu sawiin Hnahthial District tihmingtha a, ti hmingchhe theitu an ni tih hre reng turin a chah a ni. Sorkarin a ngaih pawimawh em em, Bana Kaih (handholding) diltu tam tak zinga, a dawng tura thlan chhuah an nih avangin an vannei hle a ni tih hre reng turin a chah a. Sorkar thawhpui bank ten uluk takin an vil chhunzawm dawn avangin nasa taka tan la turin a ngen nghal bawk a ni. Training hlawhtling tak neih a nih theih nan an thil zir te uluk taka ngaithla tura chahin traning a hawng a ni.

He hunah hian Pu R. Vanlalruata, SDC Hnahthial chuan Bana Kaih Scheme chungchang a hrilhfiah a. Pu Biakchungnunga, Accounts Officer, DRDO in Accounting Keeping, Day Book tih thupui hmangin zirtirna a pe a. Pi Thelma M. Zokimi, General Manager, MRB Hnahthial chuan MRB hnuaia Loan Scheme chungchang a zirtir bawk a ni.