Vawiin chawhnu khan Vanapa Hall-ah Mizoram Bharat scouts & Guides te chuan khawvel hmundangte ang bawkin Scout & Guides dintu Lord Baden Powell a te nupa piancham pha intawm hriat reng nan, khawtlang leh chhungkaw tana mi tangkai ni tura inhlan tharna leh in zirtirna ni "World thinking day" an hmang a. he hun hi Pu Hmingdailova Khiangte, Parliamentary Secretary, Sports & Youth service, etc., chuan khuallian ah tangin a hman pui a ni.

World thinking day lawmna inkhawm hi Mizoram Bharat scout & Guides(MBS&G) a State Chief Commissioner Pu Lalzirmawia chhangte, Director, Sports & Youth Services Department in sawihawnna nei hmasa in a kaihruaia. He huna thusawitu khuallian Pu Hmingdailova Khiangte chuan zirlai te chu an lehkhazirna kawnga an hlawhtlin theih nan tan la tur in  a fuih a.Zirna leh Zirlai bakah nunchang mawi leh hawihhawmna, khawtlang leh ram tana an mawhphurhna kawng hrang hrang zirtirtu te hnen atanga an dawnsawn thin te chu vawng tlat tur leh thanlen pui turin a chah bawk a ni. Puitlin huna kan nihna turah tun huna  tumna leh rilru siamna felfai a pawimawh em avangin tuna tanga an nih tum ah zirlaite an chian hmasak a ngai a ni a ti.

Vawiin World thinking day programme ah hian Khuallian Pu Hmingdailova Khiangte, Parliamentary Secretary, MBS&G Vice President Rev Dr C.L. Hminga leh State Chief Commissioner Pu Lalzirmawia Chhangte ten Himalayan Wood Batch traning zo mi 10 te hnenah te, Long service decorations chawimawina dawngtute leh medal of merit dawngtute hnenah te badge leh certificate te an hlan a.

Tun dinhmunah Mizoram Bharat Scout & Guides-ah hian member 8833  awm in Chief Minister Pu Lal Thanhawla'n President nihna a chelh mek a ni.