Vawiin tlai khan Mizoram Bharat Scouts and Guides chuan kum 2010 -2013 chhunga Vice President atan Pu Vanhela Pachuau, Chief Secretary chu thu tiam tirin an la lut. Lakluhna hun hi Chief Secretary Conference Hall-ah hman a ni a, State Chief Commissioner Pu Zoliana Royte, Director, Sports & Youth Services chuan a kaihruai a ni.

Chief Secretary Pu Vanhela Pachuau chuan Scouts and Guides thiltum 'midangte tana nun' tih chu a ngaih pawimawh thu sawiin mite tana nun chu hlimna a ni a ti a. Tunlai khawvelah mitin maiin mahni kan inngai pawimawh ta lutuk leh midangte tanpui hlamchhiaha hlawkna kan um ta lutuk chu pawi a ti a. Dan in a phal chinah lawmman phut lova kan tih theih tawk tia midangte tanpui i tum ang u tiin a sawi.

Chief Secretary lakluh a nih hma hian State Chief Commissioner Pu Zoliana Royte, Director, Sports & Youth Services office ah State Executive Committee meeting neih a ni a. State level Best Scout leh Best Guide 2010 thlanna tura judge ruat chungchang te, State level Photo Contest buatsaih chungchang te, Cleanliness Drive neih chungchang leh Indian Scouts and Guides Fellowship din chungchang te an sawi ho a ni.

February 17, 2010 khan Mizoram Bharat Scouts and Guides hruaitu turte hi thlan niin President atan Pu Lal Thanhawla, Chief Minister bakah Vice President paruk thlan an ni a. Pu Vanhela hi a zin avangin midang rualin lakluh hman a ni lova, vawiinah hian a hrana lakluh leh a ni ta a ni.