Mizoram Bharat Scouts & Guides Vice President parukte zinga pakhat atan Chief Secretary, Pi L. Tochhong chu vawiin tlai khan Chief Secretary Conference Room-ah lakluh a ni. A lakluhna inkhawm hi Sports & Youth Services Director Pu Lalzirmawia’n a hmang a; Mrs. L.Rohmingthanga, Vice President, Mizoram Bharat Scouts & Guides chuan Chief Secretary chu Guide Thutiam sawitirin a la lut a, Bharat Scouts & Guides Membership Badge leh World Guide Membership Badge te beltir a nih bakah Scarf awrhtir a ni bawk.

Bharat Scouts & Guides Vice President a lakluhna inkhawmah hian Pi L. Tochhong chuan khawvela Youth Movement lian bera tel ve theihna remchang a nei chu lawmawm a tih thu a sawi a. He pawlin a tum ber, “Service to Others” chu thil ropui tak, kan Mizo nun leh sakhua nen pawh a inrem tak a nih thu sawiin, midang te tana rawngbawl hna chu chhunzawm zel turin amah ngei pawhin theihtawp chhuah a tum thu, Chief Secretary chuan a sawi a ni.

Bharat Scouts & Guides Dan-in a phal angin Mizoram Bharat Scouts-ah hian Vice President paruk an awm a, paruk zinga pahnih hi hmeichhia an ni tur a ni. State Council Meeting-in a lo pass tawh angin Vice President paruk zinga pathum hi Office chelhtu apiang luah tur (By Virtue of Office) a siam a ni a, chungte chu: 1) School Education Minister, 2) Sports & Youth Services Minister, leh 3) Chief Secretary te an ni. Vice President thlan pathum te chu Rev. Dr. C.L. Hminga, Dr. R. Tintluang Hnialum leh Mrs. L. Rohmingthanga te an ni.

President post pawh Chief Minister hna chelh apiangin chelh zel tur a dah a nih angin Pu Lal Thanhawla, Chief Minister chu President a ni mek bawk. Pu Lalzirmawia Chhangte, Sports & Youth Services Director chu State Council Meeting ni 22 August, 2013-a neihah State Chief Commissioner atan thlan alo ni tawh bawk a ni.