Vawiin chawhnu khan Pu Ashish Kundra, IAS, CEO Mizoram chuan a pisaah Electoral roll ennawn chungchanga hmalakna kalpui dan tur Political party aiawhte a sawipui a, Pu H Lianzela, Joint CEO leh Pu Malsawmzuala, Asst CEO ten telpuiin Roll ennawnna a hriattur pawimawh inhrilhhriatna hun hman a ni.

 Pu Ashish Kundra, CEO chuan,”ECI in a phut angin Electoral roll ennawnna hna hi 01.08.2019 atanga tan tur a ni a, kum 18 tling thar electoral roll a telh belh tur te leh paih ngaite bakah thil dang vanga siamthat ngaite chu hemi chhung hian ennawna tha taka kalpui tum a ni,” a ti. CEO chuan Electors Verification Programme (EVP) hmanga Pre-revision a bul tan anih tur thu te, NGO leh political party te nen a thawh hona tha neih a ngaih  nasat tur thu te sawiin Party aiawha lo kalte chu Electoral roll ennawn kawngah a tul apianga thawktute lo tawiawm turin a ngen nghal bawk a ni. CEO chuan Mizoram hmun hrang hrang atanga Electoral Roll ennawn leh endikna hna chak zawk a kalpui anih theih nan, inthlunzawnna tha, Common Service Centre buatsaih tum anih thu a tar langa, Polling station a voter tam dan a zirin Section a then anih tur thu a sawi bawk. Pu Ashish Kundra chuan,” Voter te an venga zirin emaw an awmna hmun a zirin Section a then a nih chuan inthlan kalpui hi a felfaiin a awlsam phah hle beisei a ni,” a ti a,” Bye Election buatsaih angaih  chang pawh in inthlan buatsaih a awlsam phah hle rin a ni,” a ti.

Electoral roll ennawnna hi Pre-Revision a bul tan a ni anga 01.08.2019 atangin tan ani ang. Ni 31.08.2019 thleng hian Electors Verification Programme (EVP) neih a ni anga hemi chhung hian voter ten Voter Helpline mobile app, NVSP portal emaw Common Service Centre kaltlangin Electoral roll ah mahni inendikna hun neih a ni ang. Ni 01.09.2019 atanga Ni 30.09.2019 chhungin House to House verification BLO ten an kalpui anga, roll a telh belh, paih leh siamthat ngaite chhinchhiah hna neih a ni ang. Integrated draft electoral roll hi Ni 15.10.2019 a tihchhuah hman beisei a ni a, Ni 01.01.2020 leh 15.01.2020 chhung hian ECI in hun a ruat dan a zirin Electoral roll Final Publication hi chhuah hman tum a ni.