Mizoram Chief Electoral Officer (CEO) Pu Ashish Kundra IAS chuan vawiin khan Lawngtlai tlawhin, MLA Inthlanpui 2018 atana Lawngtlai District inbuatsaihna leh an dinhmun a enfiah.

Pu Ashish Kundra hian chawhnu dar 1-ah helicopter hmangin Lawngtlai a thleng a. Addl CEO-II Pu Krishna Mohan Uppu IAS leh State Police Nodal Officer for Election Pu Neeraj Thakur IPS te'n lo tawiawmin, Lawngtlai District Election Officer Pu N. Chakhai MCS hovin Lawngtlai District atana General Observer, Expenditure Observer leh Police Observer te, SP, RO, ARO leh election official-te'n an lo dawngsawng a ni.

CEO ho hian Lawngtlai Bawrhsap office chamber-ah Lawngtlai District inthlan inbuatsaihna hrang hrang thlir ho a ni a. CEO chuan inthlan felfai tak buatsaih tura tih tur hmabak la awmte chu tha taka hlen chhuah tum turin inthlana mawhphurtute chu a chah a ni. He hunah hian Lawngtlai District-a assembly constituency pathumah polling station 161 a awm thu leh he'ng polling station awmna khuate zinga ke leh lawnga kal pawh ngai tur nia ngaih khuate pawh Kakichhuah chauh lo chu lirthei kal theih tura buatsaih fel vek tawh a nih thu ngaihthlak a ni a. Buaina chhuah palh hlauhthawnawmna (vulnerable) polling station-tea venhimna ruahman dan te, vote thlak nia inbiak pawhna leh report hrang hrang pek dan tur ruahmanna te pawh thlir ho a ni.

Hemi zawh hian Govt Lawngtlai College-a strong room chu en ho nghal a ni a. Vote chhiarna tur counting hall buatsaih dan leh chet vel dan tur ruahmanna te, control room leh thil tul dang buaipui ngai te sawi ho a ni bawk.

Mizoram CEO hian chawhnu dar 3-ah helicopter-in Lawngtlai hi a chhuahsan leh nghal a ni.