Mizoram Chief Electoral Officer (CEO) Pu Ashish Kundra, IAS chuan nimin khan Lunglei rawn tlawhin Mizoram Assembly Election 2018 hmachhawn tura inpuahchahna a enfiah. 

Pu Ashish Kundra hian chawhma dar 9:30 ah helicopter hmangin Lunglei a thleng a. Addl CEO-II Pu Krishna Mohan Uppu IAS leh State Police Nodal Officer for Election Pu Neeraj Thakur IPS te'n lo tawiawmin, Lunglei District Election Officer Dr Ankita Chakravarty, IAS hovin Lunglei District atana General Observer, Expenditure Observer leh Police Observer te, SP, RO, ARO leh election official-te'n an lo dawngsawng a ni.

CEO ho hian Lunglei District inthlan inbuatsaihna hrang hrang thlir ho niin District Election Management Planning (DEMP) hnuaia ruahmanna hrang hrangte chipchiar taka sawiho a ni a. Lunglei District-a Assembly Constituency pasariha polling station 185-a duty tur ten an duty na hmun an pan dan tur ‘Vehicle Movement Plan’ mumal tak siam a nih thu DEO Dr Ankita Chakravarty chuan a tarlang a. A tul angin Bus, Maxicab, Pickup leh lawng te ruahman a nih tawh thu a tarlang. CEO chuan Election Control Room, Media Centre leh Strong Room a hman mek Saikuti Hall te a tlawh bakah Convention Centre-a Presiding Officer te training neihna a tlawh bawk a. Inthlan felfai tak buatsaih tura tih tur hmabak la awmte chu tha taka hlen chhuah tum turin inthlana mawhphurtute chu a chah a ni. Pian phunga rualbanlote tana ruahmanna siam te, vote thlak nia inbiak pawhna leh report hrang hrang pek dan tur ruahmanna te pawh thlir ho a ni.

Mizoram CEO hian chhun dar 12 khan helicopter-in Lawngtlai pan turin Lunglei a chhuahsan a ni.