Representation of Peoples Act, 1951 hnuaia Section 126 in a phut angin vote thlak hun tawp atanga chhiar let a darkar 48 chhung Inthlan Campaign khap a ni a, November ni 26, 2018 tlai dar 4:00 atanga November ni 28, 2018 tlai dar 4:00 thleng he khapna hian a huam a, heng a hnuai ami te hi hemi hun chhung hian zawm ngei tur a ni :
1. Khapna hun in a huam chhungah hian Political Party hruaitu, party member te, inthlan campaigner zawng zawngte chu vote an neihna constituency nilo ah an awm phal ani lova. Thupek kengkawhtu Police te pawh Hotel, Guest House etc. ah election campaigner, Constituency pawn lam ami te an awm leh awmloh vil reng a, thupek zawmlote chu an vote neihna Constituency lama kaltir tura hriattir an ni bawk.
2. Television, Radio leh Newspaper ah te inthlan campaign thu leh hla, voters te rilru hneh thei thil reng reng puanzar khap tlat a ni. Hemi hun chhunga bulk SMS, Interactive Voice Response System (IVRS) leh Social Media kaltlanga advertisement tichhuak duh chuan general Party Propaganda anih chuan State-Level Media Certification and Monitoring Committee hnen atang phalna an lak a ngai a, candidate te fakna anih chuan an dinna Constituency awmna District Media Certification and Monitoring Committee hnen atang phalna an la tur a ni.
3. Khapna in a huam chhungah hian Vantlang aurinna hmanga inthlan campaign thu leh hla voters te rilru hneh thei thil puan phal a nilo
4. Khapna in a huamchhungah hian musical concert, vantlang inkhawm, kawngzawh leh voter te hip thei thildang engmah huaihawt phal a nilova, Television leh Radio ah te sawihona (panel discussion) leh inthlan thlirlawkna ang chi party leh candidate tu emaw hlawkpui theih tur thil tihchhuah khap ani bawk.
5. Vote thlak ni ah Candidate, Candidate Agent leh Party worker ten phalna pek sa lirthei pakhat theuh bak an hmang thiang lova, heng lirtheiah te hian driver telin mi panga aia tam chuan phal a nilo, Candidate te constituency dangah an awm anih chuan midangin a motor an lo hman phal a nilo.
6. Polling Station atanga metre 100 huamchhungah voter te thlem leh biak tlawn phal a nilova, mobile phone/cordless phone pawh inthlan buaipuitu official te bakin hman phal a nilo.
7. Zu in khapna thu Sawrkarin alo tihchhuah tawh chu khawng taka kalpui ani ang.
He khapna thuchhuah in a huam chhungah hian Model Code of Conduct bawhchhiatna a awm chuan a bialtu Returning Officers te hnenah leh Election Control Room number 2316719/2317717 te engtiklai pawhin biakpawh theih an ni a, hei bakah hian cVIGIL mobile application kaltlangin complaint thehluh theih a ni a (cVIGIL apps hi Google Playsore atang a download theih a ni). Heng complaint lo lut te bawh zui tur hian Constituency tinah Flying Squad leh Static Surveillance Team te engtiklai pawh a chechhuak turin an inring reng a ni.
Heng thupek zawmlo te chu Section 126 of Representation of Peoples Act, 1951 hnuaiah tangka chawitir emaw, kum hnih thleng Jail tan tir emaw, a pahnih emaw a hrem theih an ni
