Mizoram CEO Pu Ashsish Kundra, IAS chuan vawiin khan political party zawng zawng aiawhte kokhawmin State Media Centre, Secretariat Annex-I Building-ah meeting a neihpui a. Tun hnaia Tripura Camp-a Bru voter ten Mizorama vote an thlak theihna tur polling station Kanhmun khuaah an buatsaih mekna hmun a tlawh thu leh inthlan kaihhnawih pawimawh thil dangte a sawipui.

CEO Pu Ashish Kundra chuan inthlan ni chu kar khat vel chauhin min dang tawh a, chuvangin a hun dik takah Mizoram mipuiin vote an thlak theihna turin sorkar chuan theihtawp a chhuah meknaah political party-te pawhin an thlawp that a pawimawh hle a ni, a ti. Tuna state chhunga ruling party ni mekin sorkar hnathawkte, sorkar hmun leh hmanrua engmah an advantage tan hman phal a ni bik lo tih an hriat a ngai a tih thu a sawi a. MNF Party-in Party dangte chanchin chuanna pamphlet an sem mek pawh hnukdawk tura hrilhin, hei hi Election lam chuan ngaihmawh hle a, Danin a phut angin hmalak pawh a ngaih hmel thu a sawi bawk. ECI-in a phut angin Candidate tupawh criminal case lo nei tawh leh nei mekte chuan newspaper leh TV hmangin mipui hriatah an puangzar ngei ngei tur a ni a. Heng zawng zawng hi Campaign tawp ni 26th November, 2018 (Thawhtanni) dar 4:00PM hma ngeiin tihfel/zawm ngei tur a ni, a ti. List of Counting Halls pawh ECI hnenah thawn ni tawhin, vawiin tlaiah an pawmpuina pawh dawn beisei a nih thu CEO chuan a sawi bawk.

Pu Ashish Kundra chuan Bru voter-te vote thlakna tur hmun Kanhmun chu tun hnaia a tlawh thu sawiin Kanhmun mipuite chuan sorkar hmalaknate lawm taka thlawpin, polling station sak hnaah pawh YMA-ten an pui mek thu a sawi a. Tripura-a Bru Camp-te pawh tlawhin inthlan niah Kanhmun-ah an tan polling station tur sorkarin a buatsaihah ngei vote rawn thlak turin a chah a - Kanhmun YMA Playground-ah Mamit District Constituency Bru voters turte tan polling station 9 siamsak a nih tur thu leh Kolasib District leh Lunglei District Constituency-a Bru voter-te tan polling station 3 ve ve playground ep chiaha Indoor Badminton Stadium, Kanhmun ah siam sak a nih tur thu a sawi a. CEO chuan Tripura Campa atanga Kanhmuna vote thlak tura lo kal Bru voter-te tan vote thlak hun hi zing dar 7:00AM atanga chawhnu dar 3:00PM thleng a ni dawn a; heng Polling Station-a officials duty turte pawh anmahni District atang theuha chah chhuah an nih thu tur a sawi a. Kanhmun khuaa cheng sa voter-te tan chuan inthlan kum dang ang bawkin sorkar sikulah polling station siam sak an ni tih a sawi bawk.