Election Commission of India chuan Pu Ashish Kundra, IAS chu Mizoram Chief Electoral Officer thar atan a ruat a. Vawiin khan Mizoram CEO thar Pu Ashish Kundra chuan chhun dar 12:00-ah Mizoram tlawmngai pawl hrang hrang - MUP, CYMA, MZP, MSU - hruaitute nen inkawmna hun tha tak a neih bakah dar 1:00PM khan chanchinbumite kokhawmin Press Meet a nei bawk.
Mizoram CEO Pu Ashish Kundra chuan vawiin atangin CEO charge a lak thu leh Raj Bhawan Northern Gate bula Secretariat Annexe Building-a CEO pisa chu a luah tan nghal a ni tih a sawi a. Rampum hriat hlawh khawp leh state dangte tana entawn tlak khawpa inthlan muanawm leh felfai tak neihna thin Mizoramah boruak duhawm vak lo a thleng palh kha pawi a tih thu sawiin Pu Kundra chuan hun kal tawh chu hnuchhawn thiam a, kan hma lawka inthlan awm tur atan theihtawp chhuah turin Mizoram mipui zawng zawngte tanrual a ngai dawn a, state pumah boruak muanawm leh tha tak hnuaiah inthlan neih a nih theih nan tlawmngai pawlte leh media lamte an pawimawh hle dawn a ni, a ti. Mimal tak pawhin inthlan felfai tak neih theihna tur leh Mizoram hmingthatna chu vawnghim thei turin theihtawp chhuah a inhuam thu a sawi bawk. Tun dihmunah Assembly Constituency 40-ah Candidate 209 an ding dawn a; inthlannaa hman tur postal ballot-te, EVM ballot paper te pawh peihfel thawhkhat tawh a nih thu a sawi a. Kolasib District boruak kal zelah Bru voter registration leh PIL Court-in a ngaihtuah mekte chu theihtawpa bawhzui zel a ni a, eng kawngah pawh nise Dan (law) awm sa zawmin sorkar chuan hma a la mai dawn a ni, a ti bawk.
CEO Pu Kundra chuan tlawmngai pawl hruaitute leh Press ho zawhna hrang hrang a chhang a. Bru voter-ten an vote thlakna turin ramri hnaih deuh Kanhmun khuaah polling station siam sak a nih a rin thu leh tun dinhmunah Central Armed Forces company 40 chah chhuah zingah company 20 chuan Mizoram an thleng tawh a, November ni 22-ah company dang 20 an rawn thlen belh hman a beisei thu a sawi a. Polling Station 32 te chu ‘critical’ ah dah niin videography nen an vote thlak lai zawng zawngte pawh thlalak vek a nih dawn thu a sawi. Pu Kundra chuan vawiin tlai dar 4:00-ah Mizoram District zawng zawng DC/DEO leh SP te nen video-conferencing hmangin meeting an neih tur thu a tarlang bawk.
