Vawiin khan Mizoram Chess Association (MCA) chuan Electric Veng YMA Hall-ah Mizoram State Sports Council sponsor-in 15th Mizoram Open Chess Championship leh 17th Mizoram Junior & Sub-Junior Chess Championship a buatsaih.

He Championship hawnna ah hian Parliamentary Secretary Pu Lal Thanzara chu khuallian niin, Pu PC Lallianthanga, Advisor, MCA buatsaih, “Chess Kaihhruaina Bu” chu a tlangzarh nghal a. Khuallian chuan chess chu infiamna dang ang lo takin thahrui hman aia thluak leh ngaihtuahna hman ngai zawk a ni a, chuvang chuan chess khelmite hi IQ tha tak nei an ni a ti. Benjamin Franklin an “The Morals of Chess” a ziahna ah chuan chess hi ngaihtuahna tha leh tangkai, hringnun zawh kawnga kaihruaitu hlu tak anih theih zia a tarlang a. Hei hian chess chu infiamna chikhat mai anih lohzia a ti lang a ni tiin, Championship-a tel tur kalkhawm tam tak an awm chu lawmawm a tih thu a sawi.

He Chess Championship khel tur hian district hrang hrang atangin an kalkhawm a. Category pali - Open Category, Under-17, Under-13 leh under-10 ah te then a ni. MCA hi 1976 a din niin, 1978 ah All India Chess Association-ah inziaklutin, tunah hian India ah ‘rated players’ 10 an nei a ni.