No.2424/2021-2022

Aizawl 1st October 2021: Vawiin chawhnu khan Mizoram chhunga NABARD kaltlanga SHG Rural Mart hmasa ber 'Sel Hel Rural Mart' Venglai, Kolasibah hawn a ni a. He hunah hian Dr.H.Lalthlangliana, Deputy Commissioner chu khuallian niin Pi H.Lalchhandami, CEO, MzSRLM, Pu JD Traite, DDM, NABARD, Pu Gaston Vanlalhriatpuia, BDO, Thingdawl leh Dr.Hmingthanzuala, DIPRO ten an tawiawm a Bilkhawthlir RD Block hnuaia SGH hruaitute an tel a ni.

Dr.H.Lalthlangliana, Deputy Commissioner, Kolasib chuan 'Sel Hel Rural Mart' a SHG kutchhuak phochhuahna leh zawrh chhuahna tur hmun MzSRLM leh NABARD kaltlanga hawn theih a buatsaih a ni chu lawmawm a tih thu sawiin pawl anga sumdawnna kawnga thawhhona ah SHG chu hma thui tak an sawn tawha a hriat thu a sawi a. Teirei peihna leh tum ruhna chu hlawhtlinna a nih thu sawiin Bilkhawthlir SHG kutchhuak, kuhva hnah hmanga thleng (plate) leh thil dang siam chhuah pawh, an siamchhuah tirh ngaihtuah chuan hma nasa takin an sawn tawh thu a sawi bawk a ni. Khuallian chuan hnam dang pawh ina an tih theih chu tih theih ve ngei tum a inzir peih a pawimawh thu a sawi a, hnam dang pawhin ‘Mizo kutchhuak chu a tha ber a ni’ tih ngaihdan hial an neih theihna turin SHG kutchhuak chu belhchiandawl tak a siam chhunzawm zel turin a chah bawk a ni. DC chuan ‘Sel Hel Rural Mart’ chu sumdawnna in a nih angin indawrtawnna hmun nuam tak a siam turin a enkawltute a fuih a, min dawr tur a lo leng lute chu hawihawm tak leh angkhat vek a dawngsawng thin turin a chah bawk a ni.

Pi H.Lalchhandami, CEO, MzSRLM chuan Bilkhawthlir block hnuai a SHG-te hmalakna hrang hrangah entawntlak a tih thu leh National Level ang ah pawh lawmman dawng tawh an nih thu sawiin an thiamna leh theihna hmanga an thil siam chhuah zawrhna tur hmun mumal tak 'Sel Hel Rural Mart' hawn theih a buatsaih a ni ta chu lawmawm a tih thu a sawi a. NABARD nen a an thawhhonaah lawmthu sawiin Sawrkar hnuai a Department hrang hrangte nen hetianga thawhhona awm chhunzawm zel tura a duh thu a sawi bawk a ni. Pi H.Lalchhandami chuan SHG member-te thiam thil tih pun nan a tul angin mithiamte kaltlangin Training ruahman a theih reng thu a sawi a, ram pawn a chhawpchhuah tlak leh zahpuiawm loh siam chhuahna kawngah hma la zel turin a fuih bawk a ni.

Vawiin ‘Sel Hel Rural Mart’ hawnna hun hi Pu Timothy R.Lalhmangaiha, BDO, Bilkhawthlirin kaihruaiin Pi Lalrinzuali Varte, BMM in report-a pe a, Pu JD Traite, DDM, NABARD-in MzSRLM nena thawh hona an kalpui dan tlangpui tarlanna hun hmangin Pi Lalduhsaki, President, Serlui CLF-in thusawina hun a hmang bawk a ni.

'Sel Hel Mart' tih puitlin nan hian District Development Office, NABARD, Kolasib atangin Rs.4.75 lakhs leh MzSRLM a?angin Rs. 25,000 ruahman a ni a, hei hian Rural Mart dawr luahna mante, dawr nghaktu hlawhte leh dawr enkawl nana tul hrang hrang buatsaih nana tih a ni. He project hi NABARD hnuaiah hian kum 2 chhung kalpui tur a ruahman a ni a, kum 2 ral hnu hian SHG-ten an mahni a inenkawl chho thei tur a tih a ni bawk a ni. Sel Hel Rural Mart-ah hian Bilkhawthlir RD Block chhunga SHG Cluster Level Federation 3 awmte thil siam chhuah zawrh chhuahna hmun tur a ruahman a ni a, Serlui Cluster Level Federation ten an enkawl dawn a ni. Rural Mart-ah hian SHG kutchhuak chiah zawrh chhuah tum niin bazar hmun aia tlawm a zawrh ?hin tum a ni bawk a ni. DMM, NABARD, Kolasib hmalakna hnuaiah hian Kawnpui Venglai leh Bairabi South-ah thlai thar zawrh chhuahna hmun, Rural Haat sak a lo ni tawh bawk a ni.