Chief Minister Pu Lal Thanhawla leh NITI Aayog Vice Chairman Dr. Rajiv Kumar te kaihhruaiin vawiin khan Mizoram chhunga zirna in hrang hrang hotu ten Chief Minister’s Conference Hall, Aizawl-ah meeting an nei.

Chief Minister Pu Lal Thanhawla chuan economics-a mithiam chungchuang Dr. Rajiv Kumar-an NITI Aayog Vice Chairman dinhmun pawimawh tak a luah veleh India ram State dangte aia a zinna hmasa atan hmarchhak State a thlang chu lawmthu sawiin hei hian hmarchhak bial a ngaih pawimawhzia a tilang a ni, a ti. Act East policy pawh sawrkar laipuiin ngai pawimawhin chak takin hma a la zel a, Mizoram chhungah ngei pawh he policy kaltlang hian Kaladan Multi-Modal Transit Tranport Project kalpui mek a nih thu a sawi a, he policy hi  North East State-te tan chauh ni lo ram pum tan a tangkai hle dawn a ni, Chief Minister chuan a ti.

Dr. Rajiv Kumar chuan North East State hrang hrang a tlawh kualnaah Mizoram hi a palina niin State tinah sawrkar mi pawimawhte bakah khawtlang hruaitute leh zirna in University leh Institution dang hotute a kawm thin thu a sawi a. State tinte hmasawnna hna thawk tur chuan a chhunga chengte ngaihdan  hriat a pawimawh a, India ram zau takah hian State hrang hrang mamawh a inan loh avangin ang khata hrut rual chi a ni lova, a mi chengte mamawh a hmuna zir chiang turin an kal tih sawiin NITI Aayog Vice Chairman chuan meeting pawimawh tak neih mekah Mizoram hmasawnna tur rawtna tha leh a taka kalpui theih tur an ngaihtuah chhuah a beisei thu a sawi. NITI Aayog hi Planning Commission nen a inang lo va, sum leh pai pek chhuah tur an nei lo tiin ram hmasawnna ngaihtuah tura din leh en zuitu an nih thu a sawi a. State tin ten chak zawka ke an pen theih nan kawng hrang hrangah inelna tha siam zel an tum thu Dr.Rajiv Kumar chuan a sawi bawk.

Meeting-ah hian Mizoram University, National Institute of Technology,  Institute of Chartered Financial Analysts of India (ICFAI), Pachhunga University Coolege, Zirtiri Residential Science College, Higher and Technical Education, Women Polytechnic, Health and Medical Education, School Education, Regional Institute of Paramedical and Nursing Sciences (RIPANS),  Mizoram Institute of Medical Education & Research (MIMER),  Centre for Entrepreneurship Development (CED) aiawh te an tel a ni.  Heng zirna in hrang hrang leh sawrkar department aiawhte hian NITI Aayog Vice Chairman leh a thawhpuite zingah chak zawka an institution theuh leh Mizoram state in hma a sawn theihna turin rawtna an thlen bakah harsatna an tawhte leh mamawh an neih te an thlen a ni.