No.648/2020-2021

Vawiin khan Mizoram Chief Minister Pu Zoramthanga chuan Mizoram mipuite hnenah thuchah sawiin Tripura, Meghalaya, Assam leh Manipur-a tangkhangte hruai haw an ni dawn, a ti.

State thenawm a tangkhang te engtinnge Mizoramah hruai haw an nih theih ang tih sawrkarin a ngaihtuah a. Thlawhna leh rela lak ngai hmun hla zawka awmte chu a la harsa a, motor-a in phurh phak chin hi chu lak luh a tha e tiin April ni 13-ah Council of Ministers in a ngaihtuah a. Amaherawhchu, April ni 15 ah India sawrkarin lockdown kaihhruaina a tihchhuahah State hrang hrang inkara mipui inkal pawh a khap bur avangin he hmalakna hi a thuanawp ta a. Sawrkar laipui dawr chhunzawm niin Home Ministry chuan “phalna kan pe dawn lo a, an awmna state te nen remruatna in siam theih chuan in inphurh hawn pawh kan hnial chuanglo” an tih avangin Mizoram sawrkar chuan hma a la nghal a. Heng state palia tangkhang mi engemawzatte lakchhuah an nih theih nan an tangkhanna state sawrkar dawr niin rem an tih hnuah lakluh an nih theih nan sawrkarin ruahmanna a siam ta a ni, Chief Minister chuan a ti.

He a message-ah hian Mizoram Chief Minister chuan tangkhangte lakluh an nih dan tur ruahmanna hetiang hian a sawi a - “Mahni motor-a kal tang ta te chu an motor theuha an lo hawn kan remti dawn a. A lo lut zawng zawngte hi an in lam pan lovin quarantine facility ah ni 14 an awm vek a ngai dawn a. Motor neilote hawna tur motor ngaihtuah dan tur chu Assam leh Meghalaya ah Mizoram House DRC te, Tripura leh Manipur-ah pawh kan mite aiawh remchang hmangin motor neilote lo haw dan tur remruat turin kan ti a. Hawnna man peksak kan ngailo ve ti thei ten mahni chuan man an pek theih chuan kan lawm khawp ang. Hawn man nei tawh lo mangang zual te chu an hawn man kan pek sak lo thei lo ang a, chungte chu kan pek sak ang” a ti.

Mahni khaw hnai vai quarantine facility ah lo haw te hi dah an ni ang a. Quarantine-na hmun hi an hawna tur District Headquarters ah theuh ruahman a ni a. Entir nan, Champhai District a haw tur chu Champhaia quarantine hmun buatsaihah dah an ni ang. Quarantine-a an luh dawnah Rapid Test Kit hmanga COVID19 hri an pai leh pai loh test an ni ang a. Positive an awm chuan COVID-19 atana ruahman hospital-ah dah nghal an ni ang. Test-a negative te chauh sawrkar quarantine facility-ah dah an ni ang. Ni 14 hnuah an chhuah dawnah check leh vek an ni ang a, an negative chuan an inah home quarantine phal sak an ni ang.

April ni 30 atanga May 2 inkarah heng State palia tangkhangte hi lakluh tum an ni a. Hemi chhunga tihkim hman a ni loh chuan mamawh angin hun pawhsei a ni ang. Assam-ah mi 154, Manipur-ah mi 318, Meghalaya-ah mi 201 leh Tripura-ah mi 20, an vaiin m 693 te lakluh tum a ni a. Chhungtinten mahni mimal thutlukna an siamna tur erawh chu, kal leh a khirh viau theih avangin an fate lehkhazir chhunzawm duh tur, awm tlang law law duh zawk an awm chuan awm tlang kha a remchangah kan ngai, Chief Minister chuan a ti.

Lock down chu thlakhat kalpui a ni ta a, COVID19 hripui leng chu khawvel leh India ramah a la nasat em em laiin Mizoram kan ziaawm a. Ram chhung State dangte nen kan inzawmna leh inkalpawhna hi tihsual chuan hlauhawmah a tang vek thei a, chuvangin lockdown hi kalpui a tul a ni, Chief Minister chuan a ti a. Lockdown pawhsei chungchangah India Sawrkar kalpui dan nen inhmeh mil zel a ngai, a ti. Pu Zoramthanga chuan khawchhunga duty te an hah a, ramhnuai leh ramria duty te an hah lehzual a, mi tlawmngai inpe, thalai te leh thawktu zawng zawng zan riaka ruahsur kara duty ten theihtawp an chhuah tlang a, “In zavaia chungah lawmthu kan sawi a ni” , a ti a. Doctor leh damdawi lam mi thiamte theihtawpa he ram him nana thawktu, damlo chi hrang hrang enkawltu, a hmatawnga tang - doctor, nurse leh thawktu dangte chungah lawmthu kan sawi a ni, a ti bawk.

CM Relief Fund petute chungah lawmthu sawiin COVID19 avanga harsatna tawk mi tam tak hnenah tanpuina pek an ni tawh, a ti a. A petu kohhran, pawl leh mimal zawng zawng chungah lawmthu Chief Minister chuan a sawi a, Zoram mipuite tana pe an ni tih hriain theihtawpa tan la lehzual turin mipuite a ngen a ni.

Pu Zoramthanga chuan khawvel, India leh Mizoram economy dinhmun ngaihtuahin kan hmabak a huphurhawm kan ti vek a, nunphung pangngaiah lut dawn pawh ni ila kan economy dinhmun kan ngaihtuah lawk tlan a ngai a ni, a ti a. Mizoram chu COVID awmlohna State nih thuai kan inbeisei laiin thil tihtur pahnih kan nei a, chungte chu- ramri uluk taka vena, ei leh bar kan harsat loh nana hmalak tlan te a ni, a ti.

Thlai chi thlak a hun tawh a; mahni huan, lo leh leiletah bul tanin, COVID19 natna ti darh lo zawng leh awm khawm lut lut lovin hna a thawh theih vek a ni, Chief Minister chuan a ti a. Buh emaw thlai emaw chinga theihtawpa inbuatsaih lawka, hma kan lak a tul tih sawiin buh a tam thei ang ber tharchhuah dan te, thlai ei tur leh sum chang thei thlai te theihtawpa thawkchhuaka, tharchhuak turin hma i la ang u, tiin Mizoram mipuite a fuih a ni.

Kan unaute zawng zawng rethei leh harsa lutuka an awm loh nan theihtawpa hmalak zel kan tum tiin Chief Minister chuan “Mizoram mipuite thlaphang leh mangangin awm lo ila, Pathian tanpuinain tawngtai chungin thlamuang takin awm ila, fimkhur takin kan kal zel dawn nia” tiin Mizoram mipuite a chah a ni.