No.649/2020-2021

Vawiin khan Union Minister of Electronics and Information Technology Shri Ravi Shankar Prasad chuan COVID-19 dona kawnga state hrang hrang hmalakna State Information & Communications Technology Minister-te Video Conference a neihpui.

Information & Communications Technology Minister Pu Robert Romawia Royte chuan COVID-19 hripui dona kawngah Mizoram sawrkar in IT service a hman tangkai thu a sawi a. Minister Pu Robert Romawia Royte chuan COVID-19 hripui len laiin, Mizoram chhungah IT service tha, telephone service leh internet service khaihlaklo, a bik takin thingtlang leh khaw hla taka awm ten sawrkar thuthar leh pawimawh a puan an hriat theih nan mamawh a nih thu Union Minister Shri Ravi Shankar Prasad hnenah a thlen a. Union Minister chuan IT Minister in a thlen chu a ngaih pawimawh tur thu a sawi nghal bawk a ni.

Minister chuan Mizoram chu India ram chhungah lockdown puang hmasa ber a ni a, Mizoram a COVID-19 damlo pakhat awm pawh nimin khan Test Negative Result a nih thu a sawi a. COVID-19 contact tracing atana sawrkar laipui mobile application siam ‘Aarogya Setu’ chu tha a tih thu sawiin, Mizoram sawrkar pawhin mCOVID-19 application a siam thu leh mCOVID-19 ah hian Aarogya Setu application chhunga awm lo tualchhung atana tangkai- state sawrkar guidelines, inter-district atana mPass, help line, local level task force registration, quarantine recording, monitoring system, Chief Minister’s Relief Fund payment gateway, help line leh adangte a awm thu Video Conference-ah hian a sawi bawk a ni.